Американската актерка Скарлет Јохансон откри дека во текот на работата на нејзиното режисерско деби Eleanor the Great се соочила со неочекуван и сериозен притисок од финансиски инвеститор, кој побарал да се смени клучен дел од приказната – лагата на главната хероина за преживување на Холокаустот.
Во интервју за британскиот весник Телеграф, Јохансон изјави дека инвеститорот инсистирал лагата во филмот да се однесува на „нешто друго“, а не на Холокаустот. „Тие всушност се спротивставија на тоа што филмот навистина е“, изјави таа, додавајќи дека не понудиле никаков конкретен алтернативен предлог, туку само оцениле дека темата претставува проблем.
Актерката нагласи дека постои јасна разлика меѓу продукциски барања и директно мешање во суштината на приказната. Според неа, разумни услови околу локација или рокови би биле прифатливи, но обидот да се промени смислата на приказната бил нешто сосема друго.
По неколкумесечни разговори, инвеститорот се повлекол од проектот, носејќи со себе и значаен дел од буџетот. „По толку месеци разговори, ова ли беше исходот?“, изјави Јохансон, опишувајќи го моментот како шокантен и длабоко разочарувачки.
Проектот бил спасен откако како дистрибутер се вклучил Sony Pictures Classics, со што бил надоместен финансискиот недостиг. Јохансон, која е од еврејско потекло, истакна дека нејзината лична позадина имала клучна улога во одлуката да го режира филмот. „Јас го познавам овој свет и ги познавам сите верзии на Елеонор“, изјави таа.
Филмот Eleanor the Great ја следи приказната за 95-годишната Елеонор Моргенштајн, лик што го толкува June Squibb. По смртта на својата најдобра пријателка, Елеонор се чувствува длабоко осамена и се приклучува на група за поддршка на преживеани од Холокаустот во локален еврејски центар. Потоа, охрабрена да ја раскаже својата животна приказна, таа ја присвојува судбината на својата почината пријателка Беси и ја претставува како сопствена.
Филмот започна со кино-дистрибуција во септември и моментално се прикажува ширум светот, вклучително и во Израел. Критиките, меѓутоа, се поделени. The Guardian му додели две од пет ѕвезди, оценувајќи дека филмот погрешно ја проценува тежината на темата, додека Variety го опиша како „неодолив филм за широка публика“. На премиерата, филмот бил поздравен со петминутни овации.
