СДСМ денеска соопшти дека, како што наведуваат, медиумските и пропагандни „кујни“ на ВМРО-ДПМНЕ повторно пласираат лажни вести, манипулации и координирани напади врз опозицијата и претседателот на партијата, Венко Филипче, по ист модел користен во времето на поранешниот премиер Никола Груевски.
„СДСМ веќе го покажа системот по којшто кујните на ДПМНЕ пласираат лажни вести, манипулации и напади врз опозицијата и претседателот Филипче“, се наведува во соопштението.
Од партијата обвинуваат дека ваквите напади се активираат секогаш кога власта се соочува со скандали и сериозни обвинувања.
„Секогаш кога власта е фатена во криминални тендери, во скандали и во договори со мигранти, посегнува по дефокусирање на вниманието на јавноста со пласирање текстови со напади врз опозицијата“, соопштува СДСМ.
Како доказ за континуитетот во начинот на дејствување, од СДСМ наведуваат дека се користат дури и идентични или речиси идентични наслови.
„Денеска објавуваме уште еден доказ дека кујните на ДПМНЕ функционираат исто како во времето на Никола Груевски. Дури и истите наслови за напади на СДСМ и новото раководство ги користат“, стои во соопштението.
Како примери, СДСМ посочува наслов од 2014 година – „Заев го објави тимот, истите луѓе повторно на клучни позиции“, и наслов од 2025 година – „Новото раководство на СДСМ: Нова сила, а всушност стари лица“.
„Сè е по сценариото на Никола Груевски и на Вучиќ, copy-paste“, наведуваат од СДСМ.
Од партијата оценуваат дека ваквите, како што ги нарекуваат, лажни вести и манипулации имаат цел да го одвлечат вниманието на јавноста од суштинските прашања.
„Лажни вести, манипулации и одвлекување на вниманието на граѓаните од главните теми – од криминалот и корупцијата, од договорот мигранти за пари, од противуставната Резолуција, од катастрофалната економска политика и намерната изолација на земјата надвор од ЕУ“, се вели во соопштението.
На крајот, од СДСМ порачуваат дека ваквите практики се, како што велат, целосно разоткриени.
„Разоткриени се. Знаеме сè. Ова нема да им помине“, соопштува СДСМ.
