Stranger Things влегува во својата последна фаза. Петтата сезона ќе биде финалното поглавје на една од најгледаните Netflix серии, а очекувањата се огромни.
Онлајн просторот одамна е преполн со фан-теории и сценарија. Некои бараат спектакуларна херојска завршница, други не бегаат од трагедија, но повеќето имаат едно заедничко барање: крај што нема да ја поништи емоционалната врска со серијата.
Како што се ближи крајот, фантазијата на фановите оди чекор подалеку од логиката. Дел од теориите се креативни, дел апсурдни, а дел толку луди што токму затоа станале вирални.
Еве неколку од нив:
Хокинс всушност никогаш не постоел
Една од поекстремните теории вели дека целиот град Хокинс е дел од психолошки експеримент, а Upside Down е проекција на колективната траума на децата. Според ова гледиште, финалето би открило дека ликовите се наоѓале во изолирана институција, а настаните биле „контролиран хаос“. Теорија што многумина ја мразат – но постојано се враќа.
Елевен е вистинскиот „негативец“
Според оваа теорија, моќите на Елевен несвесно го создале Upside Down, а Векна е само производ на нејзиниот страв. Крајот, во ова сценарио, би ја принудил да се соочи со фактот дека таа е изворот на катастрофата – и да избере меѓу себе и светот.
Времето ќе се врати во 1983 година
Омилена, но и опасна теорија: финалната битка ќе доведе до ресет на времето, враќајќи сè на почетокот – без портали, без чудовишта, без сеќавања. Токму ова е сценариото што фановите најмногу го стравуваат, затоа што би ги поништило сите емоции и жртви.
Стив Харингтон ќе стане „чувар“ на Upside Down
Некои фанови замислуваат херојска, но мрачна судбина за Стив – тој да остане заробен помеѓу световите, како вечен чувар што спречува повторно отворање на порталите. Трагично, симболично и совршено за лик што израсна од спореден до омилен херој.
Последната сцена ќе биде обична – и токму затоа страшна
Најтивката теорија вели дека финалето ќе заврши без музика, без битка и без објаснувања. Само сцена од нормален живот, во која нешто едвај забележливо ќе сугерира дека Upside Down никогаш целосно не исчезнал. Отворен крај што ќе прогонува.
Вториот дел од петтата сезона на Stranger Things ќе биде објавен глобално на Netflix во ист момент за цела Европа. Според официјалниот распоред на платформата, новите епизоди ќе станат достапни во 02:00 часот по средноевропско време (CET), што значи дека и публиката во Македонија ќе може да ги гледа на 26 декември, веднаш по полноќ.
Редакција Фронтлајн
