Комисијата за култура на СДСМ реагираше на јавното обраќање на министерот за култура и туризам Зоран Љутков, оценувајќи дека, „кога нема резултати што можат да се покажат на терен, тогаш е најлесно да се снима видео“, и дека наместо дела, јавноста добива „ПР“ и „перформанс со министерот во главна улога“.
Во реакцијата се наведува дека „по една и пол година на функција“ во културата „нема резултати, нема капитални проекти, нема стратегија“, а ветувањата, според Комисијата, „не мрднале од хартија“. Од СДСМ тврдат дека обраќањето на Љутков е „убаво спакувана реторика без реална подлога во фактите“ и дека наводите за „системска работа на развојот на културата“ не се поткрепени со „ниту еден конкретен, мерлив и видлив резултат“.
Комисијата посочува дека, според нив, не постои нова национална стратегија за култура, нема јасен акциски план, ниту транспарентни податоци за инвестиции и нивна реализација, додавајќи дека културните институции, како што наведуваат, и натаму се соочуваат со финансиски и кадровски проблеми. Во делот за инфраструктура, од СДСМ наведуваат дека изјавите за „обновени клучни сценски простори и инфраструктура“ остануваат на ниво на декларации, бидејќи, според нив, не се објавени податоци за обемот на реконструкциите, буџетите, роковите и кои објекти се ставени во целосна функција.
Во реакцијата се оспорува и тврдењето за „над 600.000 граѓани“ присутни на културни настани, со оценка дека јавноста нема увид дали се работи за уникатни посетители, повторени броења или статистика „креирана за политичка употреба“. Комисијата додава дека поддршката за младите уметници, која министерот ја спомнува, според нив во практика е „недоволна, несистемска и често сведена на ад-хок мерки“, а како проблем се посочуваат и изјавите за „јакнење на статусот и употребата на македонскиот јазик“, за кои Комисијата тврди дека не се проследени со нов закон, стратегија или акциски план.
Комисијата наведува и дека најавената дигитализација на културата, според нив, останува „на ниво на фраза“, со образложение дека не постои национална платформа, јасна методологија, ниту јавен извештај што е дигитализирано, со кои средства и со каква намена.
„Културата навистина е моќ – но само кога зад зборовите стојат дела. Во моментов, од оваа Влада гледаме многу зборови и речиси никакви резултати“, се наведува во реакцијата, при што Комисијата додава дека кога „министерот секојдневно ја менува реалноста со снимање видеа наместо со работа на терен“, тогаш, според нив, „е време да си замине“.
