Педесет години по објавувањето на албумот Wish You Were Here, легендарниот британски бенд Pink Floyd конечно го претстави првиот официјален видео-спот за истоимената песна. Спотот пристигна една недела откако јубилејното реиздание Wish You Were Here 50 се искачи на првото место на британската топ-листа.
Видеото започнува со кадри од Месечината, по што визуелниот наратив се распаѓа во серија симболични и хаотични сцени – сперматозоиди во трка кон јајце-клетка, око исполнето со пламен, светлосни траги што се пробиваат низ темнината. Анимираните сегменти се испреплетуваат со архивски снимки од бендот во студио, како и кадри на членовите додека трчаат низ подземната железница.
Јубилејното реиздание беше објавено на 12 декември во повеќе формати. Дигиталниот пакет го вклучува оригиналниот албум од 1975 година во нов Dolby Atmos микс, изработен од Џејмс Гатри, долгогодишен соработник на Pink Floyd уште од The Wall (1979). Покрај тоа, пакетот содржи 25 бонус-нумери – девет студиски раритети и 16 концертни снимки од настапот во Los Angeles Sports Arena во април 1975 година.
Концертниот материјал потекнува од легендарната бутлег-касета на Мајк Милард, познат меѓу фановите како Mike The Mic. Милард, заедно со пријателот Џим Рајнштајн, влегол на концертите преправен и во инвалидска количка, со скриен магнетофон и микрофони вметнати во шапка. За време на петте концерти во арената, полицијата уапсила околу 350 лица, главно поради поседување марихуана, додека Милард успеал да сними еден од најквалитетните аудио-записи од целата турнеја Wish You Were Here, која опфатила 29 датуми. Материјалот за ова официјално издание го реставрираше и ремастерираше Стивен Вилсон.
Албумот Wish You Were Here првпат беше објавен на 12 септември 1975 година, како наследник на The Dark Side of the Moon, делото што го издигна Pink Floyd до планетарна слава. Албумот стана нивно најбрзо продавано издание и прво што истовремено го освои врвот на топ-листите во Велика Британија и САД. Во тој период, бендот чувствувал силен креативен притисок – Дејвид Гилмор подоцна изјави дека членовите се чувствувале креативно заробени по успехот на Dark Side.
Реизданието вклучува и алтернативни верзии на насловната песна – една со соло на педал-стил гитара во изведба на Гилмор и друга со виолински партии од џез-виртуозот Стефан Грапели.
Делукс бокс-сетот содржи два CD-а, четири LP-плочи на проѕирен винил, Blu-ray, книга, реплика на јапонски сингл и плакат од концертот во Кнебворт. На Blu-ray изданието се вклучени и три концертни филмски проекти од турнејата во 1975 година, како и краток филм на Сторм Торгерсон. Најобемниот пакет веќе се смета за колекционерска реткост, особено поради концертните снимки на Милард, кои со децении кружеле меѓу најпосветените обожаватели на бендот.
