Светската музичка ѕвезда Селин Дион ги изненади и насмеа своите обожаватели со ново божиќно видео објавено на Инстаграм на самиот Бадник, во кое целосно се соживува во улогата на Гринч. Во урнебесниот празничен скеч, Дион го спои својот култен хит „All by Myself“ со една од најпознатите сцени од филмот „Како Гринч го украде Божиќ“.
Во воведот на видеото, пејачката е облечена во целосна Гринч костимографија, седи покрај каминот со куче во скут и драматично го пее рефренот на „All by Myself“. Потоа видеото преминува во пародија на сцената од филмот од 2000 година, во која Гринч со нервоза одлучува дали да се појави на божиќна забава.
View this post on Instagram
Дион ги адаптира оригиналните реплики на ликот во духот на сопствениот секојдневен живот, со многу автоиронија набројувајќи го пренатрупаниот распоред и обврските. Кулминацијата доаѓа со современа шега: „Секако, ако ги поместам креативните идеи за во девет, сè уште ќе стигнам да легнам и бесконечно да скролам TikTok видеа.“
На крајот, таа го менува тонот и порачува дека можеби е наједноставно на сите да им посака среќен Божиќ и среќна Нова година, испраќајќи топла празнична порака зад комичната маска. Видеото завршува со враќање на „All by Myself“ и стихот „When I was young, I never needed anyone“, кој добива нов, самоироничен контекст.
Објавата ја придружи со описот: „Тивка ноќ? Не додека сум јас тука…“, дополнително нагласувајќи го својот препознатлив хумор и дистанцата од клишето за празнична тишина.
Божиќниот скеч доаѓа помалку од еден месец откако Дион, на Денот на благодарноста, им упати емотивна порака на своите следбеници, повикувајќи ги да забават, да здивнат и да бидат благодарни за она што го имаат. Во тоа обраќање таа зборуваше за значењето на поврзаноста со блиските, особено откако во 2022 година ѝ беше дијагностициран stiff-person синдром.
Иако поради здравствените предизвици ретко се појавува во јавноста, во последните месеци Селин Дион повторно се гледа во музички контекст – во октомври беше на концерт на Пол Макартни во Лас Вегас со своите три сина, а во јуни ја следеше и турнејата „Music of the Spheres“ на Coldplay. Таму фронтменот Крис Мартин ѝ упати емотивна порака од сцената, нарекувајќи ја „прекрасна сестра“ и „вистинска ѕвезда“.
Новиот „гринчовски“ божиќен видео-клип уште еднаш потврдува дека, и покрај здравствените ограничувања, Селин Дион не го изгубила ниту чувството за хумор, ниту желбата да ја споделува радоста со публиката.
Редакција Фронтлајн
