Антикорупцискиот тим (АКТ) на СДСМ денеска објави нови наводи за, како што тврдат, сериозна злоупотреба на јавни средства преку тендер за хигиена во АД Пошта на Северна Македонија, вреден 1,2 милиони евра.
На прес-конференција, генералниот секретар на СДСМ, Александар Саша Димитријевиќ, соопшти дека до АКТ пристигнало писмо од вработен во Пошта, кој како свиркач пријавува организирана шема за испумпување околу 300.000 евра годишно.
„Граѓаните сè поактивно се вклучуваат во борбата против корупцијата и криминалот. До Антикорупцискиот тим секојдневно пристигнуваат пријави со сериозни индиции“, изјави Димитријевиќ.
Според него, СДСМ веќе го објавила скандалот со тендерот што го добила фирмата „БС КЛИНИНГ ДООЕЛ“, која, како што тврдат од партијата, е блиска до ЗНАМ, а новото писмо открива детали за начинот на кој, наводно, се извлекуваат пари.
Во писмото, свиркачот наведува:
„Пријавувам организирана кражба од 25.000 евра месечно, односно 300.000 евра годишно, преку договорот со фирмата БС КЛИНИНГ ДООЕЛ.“
Според документацијата од тендерот, во сите 14 поштенски подружници задолжително требало да има по двајца хигиеничари, додека во двете главни згради на Пошта – по десет. Реалната состојба, според наводите, е значително поинаква.
„Само во четири до пет подружници има по двајца хигиеничари и тоа со работа од неколку часа дневно. Во останатите подружници има само по еден, а во Пошта 2 наместо 10 – има шест до седум“, се наведува во писмото.
Свиркачот тврди дека постојано недостасуваат околу 14 хигиеничари, додека за сите – и за оние што не работат и за оние што работат скратено – се исплаќа целосен надоместок.
„Месечниот трошок за еден хигиеничар е над 40.000 денари“, стои во писмото, при што, според пресметките, недостигот од 14 хигиеничари значи околу 560.000 денари месечно, а дополнителни околу 550.000 денари се губат поради скратеното работно време на постојните вработени.
Со вклучени дополнителни давачки, вкупната сума, според наводите, достигнува речиси 25.000 евра месечно, односно околу 300.000 евра годишно.
Како што тврди свиркачот, ваквата состојба се прикривала со потпишување лажни дневници за целосно отсутни хигиеничари и со лажни извештаи за извршени генерални чистења.
„Вработените работат во нечистотија и во супстандардни услови, додека на хартија сè се води како целосно реализирано“, се наведува во писмото.
Од СДСМ соопштија дека целосната содржина на писмото ќе биде јавно објавена и побараа Јавното обвинителство да отвори истрага по допрен глас.
„Институциите мора да постапат. Прашањето е во чии џебови завршуваат овие пари и кој ќе сноси одговорност“, порача Димитријевиќ.
Од АКТ најавуваат дека ќе продолжат со објавување информации за, како што велат, криминални тендери, нагласувајќи дека „работата не е завршена“.
