Пожарот во швајцарскиот бар започнал од прскалки на шишиња шампањ, потврди обвинителството.
Истрагата за катастрофалниот пожар во барот „Le Constellation“ во швајцарското скијалиште Кран-Монтана покажува дека пожарот најверојатно бил предизвикан од прскалки (sparkling candles) поставени на шишиња шампањ, кои биле придвижени премногу блиску до таванот, соопштија швајцарските власти, пренесува Би-Би-Си.
Обвинителката на кантонот Вале, Беатрис Пилу, на прес-конференција изјави дека „сè укажува“ оти токму тие прскалки биле иницијалната причина за пожарот, кој, според неа, се проширил исклучително брзо.
„Од моментот кога прскалките биле приближени до таванот, пожарот започнал многу брзо“, рече Пилу, додавајќи дека властите прибавиле и анализирале видеоматеријали, како и дека биле интервјуирани повеќе сведоци.
119 повредени, идентификувани 113 лица
Полицискиот командант Фредерик Гислер потврди дека 113 од вкупно 119 повредени лица се формално идентификувани, додека процесот на идентификација за уште шест лица сè уште трае.
Според досегашните податоци, меѓу повредените има:
71 швајцарски државјанин, 14 француски, 11 италијански, четири српски, еден државјанин на Босна и Херцеговина, еден белгиски, еден од Луксембург, еден полски и еден португалски државјанин. За 14 лица националноста засега е непозната, а властите предупредуваат дека бројките може да се менуваат.
Идентификацијата на загинатите е апсолутен приоритет
Шефот на Швајцарската судска полиција, Пјер-Антоан Ланжен, изјави дека идентификацијата на загинатите е апсолутен приоритет и дека во процесот се вклучени речиси сите кантонални полициски служби.
„Не смеат да се дозволат грешки. Мораме на семејствата да им ги вратиме точните посмртни останки“, истакна Ланжен.
Тој појасни дека властите ја активирале и специјалната структура Disaster Victim Identification (DVI), која обединува полиција, форензичари, лекари и стоматолози, а која била користена и во 2004 година.
Процесот трае, со меѓународна соработка
Полицискиот командант Гислер повтори дека формалната идентификација на 40-те жртви продолжува, нагласувајќи дека иако Швајцарија располага со потребните ресурси и специјалистичка поддршка, станува збор за сложен процес што бара време и координација со повеќе држави.
Властите најавуваат дека јавноста ќе биде информирана со дополнителни официјални информации како што истрагата напредува.
Редакција Фронтлајн
