Комисијата за култура на СДСМ, остро реагира на, како што наведува, незаконската и самоволна пресметка на платите во културата, спроведена по „упатство“ на министерот за култура Зоран Љутков, со целосна поддршка од Владата предводена од ВМРО-ДПМНЕ.
„Наместо почитување на Законот, Колективниот договор за култура и правосилните судски пресуди, Министерството за култура се обидува да го наметне личниот став на министерот како единствен законски модел за пресметка на плати. Тоа не е реформа, тоа е институционализирано беззаконие“, се наведува во соопштението на Комисијата за култура на СДСМ.
Оттаму јавно и недвосмислено укажуваат дека во 2023 година никогаш не било понудено зголемување на коефициентите по член 66 од Колективниот договор, оценувајќи дека станува збор за политичка манипулација.
„Ова е класичен пример на политичка манипулација – ВМРО-ДПМНЕ создава проблем, а потоа глуми дека го решава, додека реално им одзема права и пари на вработените во културата“, посочуваат од Комисијата.
Во соопштението се нагласува дека постојат повеќе судски пресуди, донесени од различни судови и различни судии, кои, како што велат, недвосмислено утврдуваат незаконско постапување на Министерството за култура.
„Наместо почитување на судството, министерот и Владата избираат ароганција, молк и медиумски ПР објави за тоа каде биле и што посетиле, додека културните работници се понижени, обесправени и финансиски оштетени“, наведува Комисијата за култура на СДСМ.
Од таму предупредуваат дека ваквото однесување не нанесува штета само на вработените во културата, туку директно ја компромитира Владата и ја изложува државата на нови тужби и финансиски загуби.
„Културата не е полигон за лични хирови, ниту пак вработените се статисти во политички калкулации. Законите и Колективните договори не се препорака, тие се обврска“, се додава во реакцијата.
Комисијата за култура на СДСМ бара итно повлекување на незаконското упатство, почитување на Колективниот договор, усогласување на платите согласно закон и преземање институционална и политичка одговорност.
