Одржувањето на 31. Конгрес на СДСМ на 24 јануари 2026 година во хотелот „Александар Палас“ во Скопје се случува во исклучително сложен момент, како за земјата, така и за партијата. Претседателот на СДСМ, Венко Филипче, во својот настап даде отчет за работата, но и категорична одбрана на партијата. Тој ја дефинира партијата како „имунолошки систем“ на државата. Неговиот настап сигнализира дека раководството, наспроти внатрепартиските превирања, се обидува да се фокусира кон заканата од власта на ВМРО-ДПМНЕ.
На конгресот беше забележано и присуството на поранешните лидери и премиери Зоран Заев и Владо Бучковски, што меѓу присутните беше протолкувано како знак за поддршка напорите за консолидација и обединување. Поранешниот градоначалник на Скопје, Петре Шилегов, и поранешниот директор на ТИРЗ, Јован Деспотовски, не се најдоа меѓу 740-те делегати, кои во изминатиот период се „прославија“ со напади на актуелното раководство на партијата.
Во својот говор, Филипче директно ги посочи опонентите како „Тројански коњи“ на ВМРО-ДПМНЕ и поединци водени од суета или уцени, но фокусот на неговото излагање беше насочен кон политичката ориентација на партијата, потенцирајќи ја улогата на СДСМ како клучен двигател на демократските вредности и евроинтеграцискиот процес на државата.
Филипче го постави концептот на „заедничкиот дом“ како централен мотив. Тој истакна дека партијата ја прифаќа историската обврска да се бори за стабилна, интегрирана и просперитетна Македонија.
Тој остро го критикуваше отсуството на план кај власта, посочувајќи дека првиот човек на актуелната влада, Христијан Мицкоски, беше пет дена во Давос, но дека таму правел селфиња по ходници.
„Додека државата пука по сите шавови, Мицкоски тера скап туризам, платен со народни пари. Македонија е во дипломатска изолација. Европскиот пат е блокиран, а тие немаат план“, рече Филипче и додаде дека „вакво дипломатско лудило и конфузија не се оправдува. Ова е предавство на националните интереси“.
Филипче, сепак, призна дека власта има план.
„Нивниот единствен план е да нѐ држат во калта на Балканот, за да може да владеат без правила, без европски судови, без контрола“, рече тој, посочувајќи дека Мицкоски е подизведувач на „проекти“ и „кеш“ што ги одобруваат неговите „газди“ Вучиќ и Орбан.
Филипче навести дека СДСМ излегува на терен за да ги победи деструктивните политики на власта на ВМРО-ДПМНЕ.
Д. Е.
