Сојузот на синдикатите на Македонија (ССМ) најави голем работнички протест што ќе се одржи на 28 јануари 2026 година во 17:00 часот во Скопје, со главно барање зголемување на работничките плати и на минималната плата на 600 евра.
Протестот ќе започне пред Работничкиот дом, по што ќе продолжи пред Собранието, Стопанската комора и Владата.
Во отворено писмо до работниците, претседателот на ССМ, Слободан Трендафилов, порачува дека протестот не е симболичен, ниту изборен, туку директна реакција на економската состојба и ниските плати.
„Овој протест е за твојата плата, затоа што истата не стигнува од први до први, а кој да протестира за твојата плата ако не прво ти, па сите ние заедно“, наведува Трендафилов.
„Со ниски плати не се живее, туку се преживува“
Од ССМ обвинуваат дека работниците се потценети и понижени и од работодавачите и од власта, кои, како што се наведува, имаат заеднички интерес платите да останат ниски.
„На едните им е важно со ниски плати да им го создавате капиталот, а на другите им е важно со ниски плати да ги гласате. Сиромашен народ, но послушен народ“, се вели во писмото.
Синдикатот предупредува дека ниските плати директно придонесуваат за иселување на работоспособното население и цели семејства од државата.
Разлика меѓу платите на функционерите и работниците
ССМ остро реагира и на, како што наведуваат, драстичната нерамнотежа меѓу платите на работниците и зголемувањата што ги добиваат функционерите.
„Неправдата значи 250 евра зголемени плати за нив и 78 проценти зголемени плати на избраните и именуваните, додека повеќе од 200.000 работници земаат плата под 31.200 денари, односно под прагот на сиромаштија“, истакнува Трендафилов.
Од синдикатот додаваат дека Владата не планира зголемување на платите во јавниот сектор – армијата, полицијата, управата, правосудството и културата – а во здравството и образованието предвидува само минимално усогласување.
„Протестот е само почеток“
ССМ обвинува дека работодавачите одбиваат зголемување на платите за да не се откажат од профитот и луксузот, а истовремено се залагаат за увоз на евтина работна сила од странство.
„Овој протест е затоа што сметаат дека не ви е потребно зголемување на платата, затоа што не барате. Ако не барате, тие мислат дека ви е доста“, наведува претседателот на ССМ.
Трендафилов порачува дека протестот не е крај, туку почеток на поширока синдикална борба.
„Овој протест е само почеток, доколку не ги зголемат платите и доколку продолжат да го газат достоинството на работниците“, порачува тој.
ССМ апелира работниците да се приклучат на протестот, нагласувајќи дека за време на протестната прошетка ќе биде обезбеден коридор за итни случаи.
