Комисијата за култура на Социјалдемократскиот сојуз на Македонија (СДСМ) реагира на одлуката за поскапување на билетите за културните настани во националните установи, оценувајќи дека таа покажува отсуство на визија и чувство за улогата на културата во општеството.
„Поскапувањето на билетите за културните настани во националните установи е уште еден доказ дека оваа власт нема ниту чувство, ниту визија што значи културата за граѓаните“, се наведува во соопштението на Комисијата за култура на СДСМ.
Од Комисијата посочуваат дека културата не смее да се третира како пазарна стока или бизнис-проект, бидејќи станува збор за јавен интерес кој веќе се финансира со пари од државниот буџет.
„Претставите, оперите, концертите и балетите се субвенционирани од Буџетот, што значи дека приходите од билетите се дополнителни средства, а не услов за опстанок на институциите“, нагласуваат од СДСМ.
Особено критички се осврнуваат на изјавата на министерот за култура Зоран Љутков, дека доколку има полни сали и се чека со месеци за билет, цените се достапни за сите.
„Ова е цинична, социјално нечувствителна и опасна логика. Според таа логика, ако нешто е посетено, треба да стане луксуз“, се вели во соопштението, додавајќи дека наместо „култура за сите“, се добива култура достапна само за оние кои можат да платат повеќе.
Комисијата за култура на СДСМ наведува неколку факти за финансирањето на културните настани:
една претстава чини стотици илјади денари и е целосно покриена од Министерството за култура, приходите од билетите и со досегашните цени значат сериозен приход за установите, расходите по изведба се минимални, а со неколку изведби институциите ја надоместуваат вредноста на продукцијата.
„Кој пие, а кој плаќа? Зошто граѓаните повторно да плаќаат за нешто што веќе го финансирале преку буџетот?“, прашуваат од СДСМ.
Во соопштението се посочува дека во услови на ниски плати и сиромаштија, културниот настан често е единствениот простор за достоинство, социјален живот и духовно олеснување.
„Со оваа одлука, Владата ја претвора културата во Версај – затворена, елитистичка и недостапна“, оценуваат од Комисијата за култура.
Како позитивен пример се наведуваат европски земји, меѓу кои и Бугарија, каде постои модел на државна поддршка по продаден билет, со цел да се задржат ниски цени и полни сали.
„Кај нас, обратно – се казнува публиката затоа што има интерес“, се вели во реакцијата.
Комисијата за култура на СДСМ бара итно преиспитување на одлуката за поскапување на билетите, јасна и транспарентна анализа на трошоците и приходите на националните установи, како и политика на достапна култура за сите.
„Културата не смее да се мери со логика на профит. Културата е право, не привилегија“, се наведува во соопштението на Комисијата за култура на СДСМ.
