Сојузот на синдикатите на Македонија (ССМ) поднесе законска иницијатива со која предлага функционерските плати да се намалат за 80 отсто, преку промена на начинот на нивна пресметка и намалување на постојните коефициенти.
Според предлогот на ССМ, основицата за пресметување на платите на пратениците и другите избрани и именувани лица треба да биде минималната плата во државата, според податоците на Државниот завод за статистика. Дополнително, коефициентите утврдени во Законот за плата и другите надоместоци на пратениците и функционерите се предлага да се намалат за 40 проценти, што во пракса, како што наведуваат од ССМ, значи вкупно намалување од 80 проценти на функционерските плати.
„За да бидат граѓаните на Македонија еднакви пред националните закони, како и пред меѓународните акти и принципи, потребно е појдовната основа за градење на платите на сите работници и граѓани да биде еднаква“, наведува ССМ во соопштението, додавајќи дека таа основа треба да биде минималната плата.
Од ССМ потенцираат дека нивната иницијатива се темели на уставните принципи на еднаквост, недискриминација и правна сигурност, како и на меѓународните трудови стандарди, Европската социјална повелба и Универзалната декларација за човековите права. „Анализите на Владата и на работодавачите покажаа дека минималната плата е доволна за задоволување на елементарните потреби на граѓаните, па оттука инсистираме на еднаков третман на сите плати во државата“, се наведува во соопштението.
Синдикатот потсетува и дека во 2023 година, заедно со Владата, бил потпишан Општиот колективен договор за јавниот сектор, со кој платите на вработените требало да се градат врз основа на просечната плата, по моделот на тогашното законско решение за функционерските плати. „Владата, како потписник на договорот, спротивно на законот и без оправдани причини, не го почитува Општиот колективен договор и не ги уреди платите на вработените, а дополнително бара и укинување на ова право на работниците“, обвинува ССМ.
Слободан Трендафилов: Пратениците веднаш да гласаат за иницијативата на ССМ
Претседателот на ССМ, Слободан Трендафилов, ги повика сите 120 пратеници во Собранието веднаш да гласаат за иницијативата поднесена од ССМ, оценувајќи дека со одложувањето на одлуката директно им се испраќа порака на работниците дека „добро се живее со минимална плата“.
„120 пратеници веднаш да гласаат за иницијативата, затоа што им кажуваат на работниците дека добро се живее на минималец и го чуваат во фиока предлогот на ССМ за зголемување на минималната плата и за зголемување на сите останати плати за најмалку 6.000 денари“, порача Трендафилов.
Тој посочи дека одолговлекувањето со синдикалните предлози е спротивно на реалната состојба со животниот стандард на работниците и дека институциите треба да преземат одговорност, наместо да ја префрлаат на другите.
„Договорете се со работниците за вашите плати, исто како што им кажувате на работниците да се договорат со газдите“, истакна претседателот на ССМ.
Мицкоски: Очекувам раководството на ССМ да излезе од партиската прегратка и да се договори со Владата
Премиерот Христијан Мицкоски изјави дека очекува дел од раководството на Сојузот на синдикатите да излезе, како што рече, „од партиската прегратка“ и да се постигне договор со Владата во интерес на административните службеници.
Одговарајќи на новинарско прашање во врска со утрешната средба со синдикатот УПОЗ и очекувањата од разговорите, Мицкоски посочи дека договорот е неопходен за вработените во јавната администрација кои сè уште немаат колективен договор.
„Очекувам да излезат од партиската прегратка тие неколкумина во раководството на Сојузот на синдикати и да се договорат со Владата во интерес на работниците, односно во интерес на административните службеници, бидејќи уште тие 7.700–7.800 наши колеги немаат со Владата договорен колективен договор, сите останати имаат“, изјави премиерот.
Тој додаде дека со евентуалното постигнување договор, Владата како работодавач ќе ги заокружи односите со сите вработени за кои е директен или индиректен работодавач до истекот на мандатот, во 2028 година.
„Со ова Владата ги заокружува односите до истекот на мандатот на оваа Влада, со сите оние на чии работодавач директно или индиректно е Владата“, рече Мицкоски.
Мицкоски не се осврна на иницијативата на ССМ за намалување на функционерските плати.
Ј. Ѓ.
