Свеченото отворање на Зимски олимписки игри 2026 се одржа вечерта на 6 февруари 2026 на легендарниот Стадион Сан Сиро, каде што спектакуларна церемонија го означи официјалниот почеток на Игрите што ќе траат до 22 февруари. Отворањето беше осмислено како спој на италијанската културна традиција, современ музички спектакл и класичните олимписки симболи, со учество на над 90 национални делегации и илјадници спортисти од целиот свет.
Церемонијата, која паралелно го поврза Милано со Кортина д’Ампецо, Ливињо и Предацо, ја истакна Италија како домаќин што се потпира на уметноста, музиката, дизајнот и спортот како свои најсилни меѓународни обележја.
Бочели како централен музички момент
Еден од највпечатливите и најкоментирани моменти на вечерта беше настапот на Андреа Бочели. Италијанскиот тенор ја изведе аријата „Nessun Dorma“ од операта Турандот на Џакомо Пучини, во амбиент што јасно ја нагласи врската меѓу Италија, операта и олимписката традиција. Настапот беше позициониран во централниот дел од уметничката програма и послужи како свечен вовед во главниот дел од церемонијата, оставајќи силен визуелен и емоционален впечаток кај публиката на стадионот и кај гледачите ширум светот.
Мараја Кери и глобалната поп-димензија
По класичниот сегмент, сцената ја презеде Мараја Кери, која настапи како едно од најголемите меѓународни имиња на вечерта. Нејзиниот настап ја внесе современата поп-естетика и ја нагласи глобалната димензија на Олимписките игри, создавајќи контраст, но и природно надополнување со класичната италијанска музичка традиција претставена претходно. Со изборот на Мараја Кери, организаторите јасно испратија порака дека ЗОИ 2026 се настан со светски културен и медиумски досег.
Италијанскиот печат: Лаура Паусини
Во уметничката програма учествуваше и Лаура Паусини, која ја претставуваше современата италијанска поп-сцена. Нејзиниот настап беше симболично поврзување на домашната музичка продукција со олимпискиот дух и дополнително ја заокружи музичката целина на церемонијата, во која класиката и модерниот звук беа рамноправно застапени.
Виторија Черети, девојката на Ди Каприо го носеше италијанското знаме
Италијанската манекенка Виторија Черети (27), девојка на холивудскиот актер Леонардо Ди Каприо, ја имаше честа да го носи италијанското државно знаме на свеченото отворање на Зимските олимписки игри 2026 во Милано.
Облечена во елегантна бела тоалета, Черети прошета низ стадионот Сан Сиро, каде што церемонијата се одржа пред илјадници гледачи и милионска телевизиска публика.
Черети, родена во Бреша – град на околу час и половина возење од Милано – ја предаде италијанската тробојка на почесната гарда на карабињерите, Корaцјерите, непосредно по настапот на светската музичка дива Мараја Кери.
За оваа пригода, манекенката носеше долга бела креација Armani Privé, изработена по мерка, со впечатливи ракави и висок околувратник. Таа се појави на крајот од долгата поворка учесници облечени во бело, црвено и зелено – боите на италијанското знаме.
Дефиле на спортистите и националните делегации
Еден од клучните сегменти на свеченото отворање беше традиционалниот дефиле на олимписките делегации. Спортисти од над 90 земји продефилираа низ теренот на Сан Сиро, носејќи ги своите национални знамиња и симболично претворајќи ја фудбалската арена во олимписка сцена. Носењето на знамињата беше доверено на истакнати спортисти од секоја делегација, со што беше нагласен принципот на еднаквост и меѓусебна почит.
Меѓу позначајните знаменосци беа американската брзолизгачка Ерин Џексон, британските спортисти Лила Фир и Бред Хол, како и низа истакнати хокејари и зимски спортисти од европските селекции.
Македонската делегација на свеченото отворање распоредена на три локации
Присуството на македонската делегација, со своите знаменосци, беше дел од дефилето што ја потврди широката меѓународна застапеност на Игрите.
Олимпискиот факел и палењето на огнот
Кулминацијата на церемонијата беше внесувањето на олимпискиот факел и палењето на олимпискиот оган. Факелот, кој претходно помина низ сите италијански провинции по своето тргнување од Олимпија, беше внесен на стадионот од низа поранешни и активни спортисти, симболично поврзувајќи ги различните генерации на Олимписките игри. Честа да го запали олимпискиот оган ја имаше истакната италијанска скијачка Софија Гоџа, што беше пречекано со силен аплауз од публиката.
Визуелна и културна сценографија
Целата церемонија беше визуелно обликувана со мултимедијални сцени инспирирани од италијанската опера, модата и архитектурата. Акробатски изведби, светлосни ефекти и симболични кореографии ги формираа олимписките пет прстени над стадионот, додека паралелните прослави во другите градови-домаќини ја нагласија децентрализираната природа на Игрите.
Со свеченото отворање на Зимските олимписки игри Милано–Кортина 2026, Италија испрати јасна порака за тоа како ја замислува својата улога како домаќин – со почит кон традицијата, отвореност кон светот и силен културен идентитет. Настапите на Андреа Бочели, Мараја Кери и Лаура Паусини, заедно со дефилето на спортистите и палењето на олимпискиот оган, ја поставија сцената за Олимпијада што има амбиција да биде запаметена не само по спортските резултати, туку и по начинот на кој ги спои уметноста, музиката и олимписките вредности.
Ј. Ѓ.
