Градските власти во Сиднеј воведоа забрана за влез во автобуси за лица кои не носат маица или се во бикини, со што повторно се отвори долгогодишната дебата за пристојноста во јавниот простор во Австралија, објави Си-Ен-Ен.
Новото правило се однесува на автобусите на линијата „Hop, Skip and Jump“, која сообраќа низ северните крајбрежни предградија Манли, Ферлајт и Балголах и се финансира со јавни средства.
„Ве молиме, облечете се соодветно. Облеката мора да се носи над костимот за капење“, стои на натписот поставен во автобусот.
Според градските власти, одлуката дали патник ќе биде пуштен во автобусот ќе зависи од проценката на возачот.
Мерката воведена по поплаки од патници
Новото правило доаѓа по поплаки од граѓани, особено од постарата популација, кои сметаат дека ваквото облекување не е соодветно за јавен превоз.
„Ние сме малку постара генерација. Би сакале луѓето да се облекуваат пристојно, особено во јавниот превоз“, изјави една жена за локалните медиуми.
Други патници велат дека автобусите се мал простор и дека ваквата појава создава непријатност.
„Мислам дека понекогаш е малку одбивно кога гледате луѓе како влегуваат практично без никаква облека“, изјави еден патник.
Сепак, не сите се согласуваат со мерката.
„Проблемот настанува кога ќе се повлече границата“, изјави една помлада жена, додавајќи дека многу луѓе носат спортска облека која исто така може да биде минимална.
Правилото сè уште не е формално внесено во кодексот
Градскиот совет сè уште не го внел новото правило во официјалниот кодекс на однесување, кој веќе забранува јадење, пиење, пушење и внесување големи предмети во автобусите.
Австралија има долга историја на „бикини конфликти“
Дебатите за облеката на плажите во Австралија не се нови. Во 1961 година, повеќе од 50 жени беа уапсени на плажата Бонди поради носење бикини, во период познат како „бикини војни“.
Во тоа време, важеле строги правила за димензиите на костимите за капење, а инспектори ги контролирале плажите.
Иако тие правила подоцна беа укинати, дебатата за тоа што е соодветно облекување продолжува и денес. Во 2024 година, предлог за забрана на танга бикини на улиците на Голд Коуст предизвика протести и национална расправа.
