Вицепремиерот и министер за транспорт Александар Николоски денеска од Прилеп најави три крупни инфраструктурни проекти кои, според него, треба да го поттикнат долгорочниот економски и транспортен развој на општината.
Тој истакна дека изградбата на автопатот Прилеп – Битола се одвива со засилена динамика и изрази очекување дека годинава ќе бидат поставени првите километри асфалт.
„Автопатот Прилеп – Битола се гради со засилена динамика и очекувам годинава да бидат поставени и првите километри асфалт“, изјави Николоски.
Покрај тоа, најави дека Владата целосно ќе го финансира проектот за изградба на обиколница околу Прилеп, со цел да се намали сообраќајниот притисок во градот и да се спречи влегувањето на тешки товарни возила во урбаното подрачје.
„Градоначалникот работи на проектна програма за изградба на обиколница, нешто што е ветувано со децении. Да давам ветување дека Владата целосно ќе го финансира овој проект и ќе биде реализиран во рамки на неговиот мандат“, рече Николоски.
Како трет крупен проект, вицепремиерот најави и изградба на нов автопат од Фариш до Прилеп, со што градот би бил поврзан со автопатска инфраструктура од двете страни.
„Во интензивни преговори сме и очекувам во следниот месец до месец и пол да започнат активности во Собранието за автопатско решение од Фариш до Прилеп“, додаде тој.
Николоски зборуваше на настанот по повод одбележувањето на 100 дена од локалната власт во Прилеп, при што нагласи дека Владата ќе продолжи со финансиска и институционална поддршка за општината.
„Сто дена е краток период, но веќе се гледа насоката на развој на општината. Владата ќе продолжи со поддршката преку буџетски средства, инфраструктурни инвестиции и поддршка на стопанството и земјоделието“, изјави Николоски.
Со реализацијата на овие инфраструктурни проекти, според најавите, Прилеп треба да добие подобра транспортна поврзаност, намален сообраќаен метеж и нови можности за економски развој.
