Портпаролката на Владата, Марија Митева, реагираше на обвинувањата на членот на Извршниот одбор на СДСМ, Андреј Жерновски, оценувајќи дека неговите тврдења за влијание врз судството се „политичка манипулација“ и обид за дефокус од, како што наведе, суштинските прашања.
Во објава на социјалните мрежи, пренесена од официјалниот сајт на ВМРО-ДПМНЕ, Митева истакна дека судската одлука за предметот на Жерновски била донесена пред речиси три месеци.
„Фактите се јасни, станува збор за решение донесено пред речиси три месеци, со кое тужбата на Жерновски е отфрлена, а барањето за надомест на штета е одбиено како неосновано. Тоа е правната реалност. Сè друго е свесна манипулација со јавноста“, наведе Митева.
Таа ги оцени обвинувањата на СДСМ како обид за конструирање „лажен скандал“, додавајќи дека нема намера да учествува, како што рече, „во игра на креирање лажни наративи“.
„Обидот да се конструира наратив за ‘скандал’ претставува класичен пример на политичка дезориентација и дефокус од суштинските прашања. Кога аргументите изостануваат, остануваат инсинуациите“, наведува Митева во реакцијата.
Портпаролката на Владата истакна дека, според неа, нападите дека Владата управува со судството се неосновани и дека институциите функционираат согласно законите.
„Нападите дека некој ‘управува’ со судовите потекнуваат од нивната долгогодишна пракса на такво практицирање, тоа време заврши“, се наведува во реакцијата.
Митева додаде дека Владата ќе продолжи да инсистира на владеење на правото, институционална одговорност и транспарентност, и ги повика политичките субјекти, како што рече, да одговорат на прашања поврзани со криминал и корупција наместо да отвораат политички конфликти.
Претходно денеска Андреј Жерновски на прес-конференција обвини дека Владата има директни информации за тековни судски процеси и оцени дека тоа претставува доказ за политичка контрола врз судството.
Жерновски: Портпаролката на Владата, Митева потврди дека Мицкоски управува со судовите
Според Жерновски, владината портпаролка на јавна дебата изнела информации за негов судски процес против Министерството за надворешни работи, кој сè уште не бил завршен.
„Портпаролката на Владата имаше податоци за тоа каква е пресудата. Јас пресудата не ја дознав од адвокатите, не ја дознав од судот, туку ја дознав од Владата на нашата држава“, изјави Жерновски.
