Скопје / онлајн, 23 февруари 2026 – Утре, на 24 февруари 2026 година во 17:00 часот, точно четири години по почетокот на целосната воена агресија на Русија врз Украина, ЦИВИЛ – Центар за слобода организира меѓународен онлајн настан со наслов „Четири години агресија: Отпорот на Украина и одговорноста на светот“.
YouTube
Конференцијата ќе обедини аналитичари, новинари, дипломати, креатори на политики и претставници на граѓанското општество од Европа и пошироко. Наместо формално одбележување, настанот е замислен како момент на јасност, одговорност и заедничко преиспитување.
Четири години по инвазијата, Украина продолжува да се спротивставува на воената агресија, делумната окупација и систематските обиди за бришење на нејзиниот суверенитет и идентитет. Во меѓувреме, последиците од војната одамна ги надминаа границите на бојното поле. Таа ја преобликува европската безбедност, ги зајакнува врските меѓу авторитарните режими, ги интензивира дезинформациите и хибридните закани и ја тестира издржливоста на демократските општества.
Организаторите нагласуваат дека ова не е само конфликт меѓу две држави, туку борба за демократските вредности, меѓународното право и одговорноста.
„Четири години по целосната инвазија, отпорот на Украина стана тест за демократската решителност. Поддршката за Украина не е само прашање на солидарност, туку и одбрана на принципите врз кои се темели меѓународниот поредок,“ изјави Роџер Касале, директор на Вестминстерската алијанса за Украина и ко-основач на Глобалната иницијатива за одбрана на демократијата.
Конференцијата е организирана во три тематски целини:
- Реалност: Украина и војната денес
Фокус на суштинската вистина – една жртва, Украина, и оска на агресори, како и долгорочните последици врз безбедноста и политиката. - Невидливата војна: Дезинформации, хибридни закани и лажен мир
Анализа на пропагандата, „лажната рамнотежа“ и наративите што ја нормализираат агресијата. - Избор: Што мора да се брани – и од кого
Одговорноста на институциите, медиумите, граѓанското општество и граѓаните да ги бранат демократските вредности.
„Украина не е само жртва – таа е огледало на светот. Фронтовите одамна се проширија надвор од територијата – во информацискиот простор, политичките системи и самата отпорност на демократијата. Прашањето повеќе не е дали оваа војна е важна, туку дали светот е подготвен да ја преземе одговорноста,“ изјави Џабир Дерала, претседател на ЦИВИЛ и ко-основач на иницијативата.
Во пресрет на конференцијата, ќе биде објавена Заедничка декларација, отворена за поддршка од организации, медиуми, интелектуалци и граѓани.
Настанот се одржува во рамки на Defending Democracy Global Initiative (DDGI) и нејзината програма Westminster Alliance for Ukraine (WA4U), во координација на ЦИВИЛ – Центар за слобода.
Конференцијата ќе биде јавно достапна преку онлајн пренос, овозможувајќи меѓународно учество и следење во реално време.
Имплементацијата е во соработка со Media Dialogue / Youth4Media (Германија), New European People’s Forum (Германија), Jean Monnet Association (Франција) и Centro Studi Internazionali (Италија).
Преземено: Цивил Медиа
