СДСМ обвини дека одлуката за одредување куќен притвор за Груби е дел од, како што наведуваат, „политички дил“ меѓу ВМРО и ДУИ.
„Политичкиот дил ВМРО-ДУИ со Груби веќе на сите им е јасен, граѓаните знаат што се случува. Разоткриено е секое делче од ова договорено сценарио“, изјави портпаролката на СДСМ, Богданка Кузеска.
Таа посочи дека, според СДСМ, целиот процес бил однапред договорен, почнувајќи од, како што рече, „режираната претстава на границата, со наочари и насмевка“, па сè до одредувањето на куќен притвор.
„Преку пречекот со камери, со медиумска поддршка на 40% од медиумите под контрола ВМРО преку Орбан, па се до одредувањето на куќен притвор од обвинителството и судството под контрола на ВМРО-ОКГ“, изјави Кузеска.
СДСМ реагира и на образложението на Обвинителството, кое, како што беше соопштено, се повикало на проценка од МВР и АНБ дека Груби „не бил безбеден“ во затворот „Шутка“, па затоа бил предложен куќен притвор.
„Вчера, Обвинителството соопшти дека МВР на Тошковски и АНБ на Христовски дале проценка дека Груби ‘не бил безбеден’ во ‘Шутка’, па затоа предложиле куќен притвор“, рече Кузеска.
Таа посочи дека истиот ден директорот на затворот „Шутка“, Бобан Утковски, го демантирал Обвинителството.
„Истиот ден, излезе директорот на затворот Шутка, Бобан Утковски, го демантираше Обвинителството и рече дека ниту МВР ниту АНБ ‘не се обратиле ниту усно ниту писмено до затворот за да побараат мислење за безбедноста’. Епа како донеле одлука во Обвинителството?“, изјави Кузеска.
Според СДСМ, ваквите случувања се потврда дека „сè е договорено“.
„Има ли подобра потврда од ова тврдење дека сè е договорено и дека јавноста само се лаже и се замајува? Сè е јасно“, рече таа.
Кузеска ги наведе и имињата на обвинителите кои постапуваат во предметот.
„Кои обвинители постапуваа во предметот и кој го предложи куќниот притвор за Груби? Предметен обвинител е Даниел Коцев, а негов шеф на Скопското Обвинителство е Анел Фидоски, кој беше избран на оваа функција на 20 јануари 2026 година“, изјави Кузеска.
Од СДСМ порачаа дека, како што наведуваат, „ваквите сценарија повеќе не поминуваат“.
„Можеби ваквите сценарија им поминуваа со години наназад, но повеќе не поминуваат – разоткриени се. Граѓаните гледаат и знаат сè. Одговорност ќе има!“, изјави Кузеска.
