„Цените на светските берзи паѓаат, само кај нас не – владата на Мицкоски профитира од народот“, реагираа од СДСМ, обвинувајќи дека Владата не ја намалува цената на горивата и покрај падот на цената на нафтата на светските пазари.
Од партијата прашуваат зошто граѓаните во земјата плаќаат поскапо гориво кога, според нив, цената на нафтата на светските берзи се намалува.
„Зошто граѓаните во Македонија плаќаат поскапо гориво кога цената се намалува?“, прашуваат од СДСМ.
„Поскапите горива ќе ги зголемат и цените во маркетите“
Од опозициската партија предупредуваат дека високите цени на горивата ќе имаат влијание и врз цените на другите производи.
„Дополнително, високите цени на горивата ќе ги покачат и цените во маркетите, сè ќе поскапи“, се наведува во соопштението.
Според СДСМ, сите земји во регионот вовеле мерки за ограничување на цените на бензините, додека, како што велат, владата на премиерот Христијан Мицкоски не презела такви чекори.
Критики и за начинот на пресметка на цените
Од СДСМ посочуваат и на одлуката на Регулаторна комисија за енергетика (РКЕ) за промена на начинот на пресметка на цените на горивата.
„Да важеше стариот систем на пресметка, РКЕ денес ќе мораше да ја намали цената на горивата и граѓаните веќе од утре ќе купуваа поевтин бензин и дизел“, тврдат од СДСМ.
Според нивните пресметки, поради оваа одлука граѓаните плаќаат околу три милиони евра повеќе за гориво во период од една недела.
„За Мицкоски и неговата влада сè е бизнис – дури и кога граѓаните плаќаат поскапо секој ден“, се наведува во реакцијата на СДСМ.
