„Срамна и безобразна е изјавата на Мицкоски кој граѓаните и работниците кои едвај врзвуваат крај со крај ги нарече хистерични“, реагира СДСМ по изјавите на лидерот на ВМРО-ДПМНЕ во врска со барањата за повисоки плати.
Од партијата велат дека повеќе од 200.000 работнички семејства во земјата живеат тешко, а наместо разбирање, како што наведуваат, добиваат навреди.
„Над 200.000 работнички семејства живеат тешко, а Мицкоски ги прави хистерични“, се вели во реакцијата.
Според СДСМ, барањето за плата од 600 евра не е „хистерија“, туку, како што наведуваат, борба за достоинствен живот.
„Не е хистерија да се бара достоинствена плата, тоа е борба за достоинствен живот, да можат граѓаните да обезбедат пристојна живејачка, леб на масата, храна во фрижидерот, да можат да платат сметки и да школуваат свои деца“, наведуваат од партијата.
Во реакцијата се додава дека во услови на поскапување на горивата, се очекува и нов раст на цените на храната и другите производи, што дополнително го отежнува животот на граѓаните.
„Сега, кога поскапе горивото, се очекува и зголемување на цените на храната и останатите производи. А тој дрско се однесува кон работниците и вели дека утре ќе барале 800 евра. Поради поскапувањата и тие ќе бидат малку“, се наведува во реакцијата.
СДСМ во соопштението додава дека според нив, барањето за повисоки плати е прашање на основна економска сигурност, а не политичка реторика.
„Не е хистерија 600 евра плата Мицкоски, тоа е борба за живот. Авион од 100 милиони евра, мерцедеси од 650.000, очила и часовници од над 60.000 евра – тоа е хистерија“, стои во реакцијата на СДСМ.
