„Улогата на централното банкарство станува уште поважна – не само како чувар на ценовната стабилност, туку и како столб на довербата, стабилноста и економската отпорност“, изјави премиерот Христијан Мицкоски, говорејќи за економските предизвици во услови на глобални кризи.
Во обраќање до претставници на централни банки и финансиски институции, Мицкоски посочи дека светот се соочува со силни инфлаторни притисоци, геополитички тензии и нарушувања во синџирите на снабдување.
Тој нагласи дека воениот конфликт на Блискиот Исток дополнително ги продлабочува економските предизвици.
„Сведоци сме на значителни нарушувања на пазарите на енергенси, раст на цените на нафтата и гасот, како и зголемена неизвесност која директно се прелева врз глобалната економија“, рече Мицкоски.
Според него, овие притисоци имаат директно влијание врз инфлацијата, трошоците за производство и животниот стандард на граѓаните.
Мицкоски истакна дека централните банки имаат двојна одговорност – да ја одржат ценовната стабилност и да ја зачуваат финансиската стабилност.
„Тоа бара внимателен баланс – помеѓу рестриктивни мерки за контрола на инфлацијата и поддршка на економската активност“, изјави тој.
Дополнително, нагласи дека дигитализацијата и финтек решенијата отвораат нови можности за поефикасен финансиски систем.
Владата најавува нови мерки
Премиерот информираше дека Владата веќе презела мерка за намалување на ДДВ за горивата, со цел да се ублажи ценовниот притисок.
„Денеска имаме редовна владина седница и ќе разгледуваме и други мерки коишто мислиме дека ќе бидат корисни во таа насока“, рече Мицкоски.
Тој додаде дека, и покрај ценовните шокови, земјата има најниски цени на горивата во регионот, што довело до зголемена потрошувачка.
„За повеќе од 10% е зголемен конзумот на бензин и дизел гориво на нашите бензински пумпи“, изјави тој.
Мицкоски нагласи дека приоритет е стабилното снабдување со енергенси и координиран пристап меѓу институциите.
„Отпорноста значи способност да се издржат шоковите, но и да се излезе посилен од нив“, рече тој.
