Владата го одобри Договорот за имплементација на проектот „Воведување на брз автобуски превоз во Град Скопје“, со што се отвора патот за реализација на еден од најзначајните инфраструктурни проекти во јавниот транспорт.
Како што соопшти градоначалникот на Скопје, Орце Ѓорѓиевски, станува збор за систем кој треба да донесе побрз, поефикасен и поеколошки јавен превоз во главниот град.
Брзиот автобуски превоз (БРТ) е концепт кој функционира со посебни ленти за автобусите, приоритет на раскрсници и висока фреквенција на возила, што овозможува значително намалување на времето на патување и сообраќајните гужви.
Според најавите, системот ќе придонесе и за намалување на загадувањето и подобрување на квалитетот на живот во Скопје.
Проектот ќе се финансира со заем од Европската банка за обнова и развој (ЕБОР) во износ од 70 милиони евра, кои ќе бидат пренесени на Град Скопје како средства за реализација.
Договорот ги дефинира обврските и координацијата помеѓу Министерството за финансии, Министерството за транспорт и врски и Град Скопје, вклучително и управувањето со средствата, административните процедури и техничката подготовка.
Истовремено, предвидено е формирање на специјална единица за имплементација на проектот која ќе го следи целиот процес.
Со одобрувањето на договорот, се создаваат услови за почеток на конкретни активности на терен – од јавни набавки и техничка документација, до старт на инфраструктурни работи.
Градоначалникот посочува дека станува збор за проект кој треба да донесе „суштинска промена“ во јавниот превоз, кој со години се соочува со сериозни проблеми.
Ѓорѓиевски изрази благодарност за поддршката од Владата и премиерот Мицкоски, како и од министрите Александар Николоски и Гордана Димитриеска Кочоска.
Паралелно со БРТ, најавена е и набавка на 100 нови еколошки автобуси, како дел од пошироката стратегија за модернизација на јавниот превоз.
„Денес конечно се преземаат конкретни и одлучни чекори за надминување на долгогодишните проблеми во јавниот превоз“, наведува градоначалникот.
Тој додава дека целта е воспоставување модерен, функционален и ефикасен транспортен систем кој ќе овозможи побрзо движење, почист воздух и подобар квалитет на живот за граѓаните.
