Мерката и бројките што ги промовира Владата не се ништо друго освен фрлање песок во очите на граѓаните, нагласи заменичката претседателка на СДСМ, Фани Каранфилова Пановска, во вечерашните вести на МРТ.
Каранфилова Пановска посочи дека мерката на Владата за намалување на ДДВ-то на горивата и нафтените деривати на 10% е задоцнета и недоволна, а реалниот товар од кризата ќе падне врз граѓаните.
„Не може да имаат граѓаните заштеда, особено не во милионски суми, ако денеска дизелот не чини 3,5 денари повеќе отколку што не чинеше во неделата. Дизел горивото за последниве 3 месеци ја крена цената за повеќе од 50%, а Владата се фали дека конечно по три недели откако почна овој последен циклус на економска криза, со една единствена мерка за намалување на ДДВ од 18 на 10%. СДСМ цени дека оваа мерка прво е задоцната, а второ воопшто не е доволна“, рече Каранфилова Пановска.
Таа додаде дека во услови на сериозна економска криза, потребен е сеопфатен и стратешки пристап со мерки насочени кон најпогодените категории граѓани.
„Најмалку што треба е да се спроведат сет на мерки кои што ќе таргетираат посебни категории на граѓани. Освен ценовните шокови, нам ни се случува паралелно и една криза на понудата. И кога се случува криза на понудата, нема што друго да очекувате, освен сериозна инфлаторна спирала. И тука се бараат мерки за сите граѓани, но пред се за оние граѓани кои се во социјално загрозена категорија, за земјоделците, за сите транспортни компании, за сите енергетско зависни гранки од индустријата, за да може некако да се амортизира овој ценовен шок. Во спротивно, граѓаните дополнително ќе осиромашуваат“, рече Каранфилова Пановска.
Во интервјуто Каранфилова Пановска посочи дека голем дел од граѓаните живеат под прагот на сиромаштијата и тешко ќе се справат со ваквите ценовните шокови доколку Владата не им помогне.
„Мора да се направат приоритети, мора да се направи сериозна стратегија и мора да се излезе со еден интервентен пакет на мерки кои што ќе го заштитат стандардот на граѓаните.Имаме над 150.000 работници кои што живеат под прагот на сиромаштијата со примања под 30.000 денари. Синдикалната кошничка ако живеете под кирија е 83.000 денари, значи дека не стасуваат ниту 4 отприлика минимални плати за да може да се сервисираат месечните трошоци. И ова што владата седи будно надгледува како стандардот на граѓаните тоне, нема што друго освен или не сакаат, не ги интересираат, односно имаат други калкулации за тоа да овој ценовен удар се прелее практично како приход во буџетот или не знаат како“, рече Каранфилова Пановска.
Притоа, таа потсети дека СДСМ во време на најголемите кризи, ковид кризата и енергетската криза, покажа вистинска грижа за сите граѓани преку различни пакети на антикризни мерки во износ од 2 милијарди евра, наменети и за граѓаните и за компаниите.
„Ако владата ги прифатеше нашите 4 мерки ќе имавме денеска за 10,5 денари поевтин дизел, а за 14,5 денари поевтин бензин. Апсолутно имаме и знаење и начини како тоа треба да се направи, но проблемот е во тоа што Владата на ДПМНЕ и Мицковски е премногу суетна, очигледно, да ги прифати и овие мерки кои што ги кажавме. Односно дека ДДВ -то кај енергенсите треба да се намали до 18%, на 5%, дека претходно треба да се намали цената на акцизата за 4 денари за да реално осетиме пад на цените. Треба да се сведе на 0% ДДВ-то кај основните прехрамбени производи и за да некако им се излезе во пресрет и на транспортните компании кои имаат трошок што практично влегува како еден од главните инпути во производствените трошоци, да се преполоват патарините“, рече Каранфилова Пановска.
