„Мицкоски е дилетант кој нема капацитет да ја води Владата“, изјави портпаролката на СДСМ, Богданка Кузеска, на прес-конференција, обвинувајќи дека владините мерки не даваат резултати и дека граѓаните веќе ги чувствуваат последиците од растот на цените.
Кузеска истакна дека се потврдиле предупредувањата на СДСМ, посочувајќи дека мерките на Владата не успеале да го запрат растот на трошоците за живот.
„Се потврди сѐ она што СДСМ го говореше и за што предупредуваше – за жал, на директна штета на стандардот на граѓаните“, рече таа.
Според неа, веќе се забележува нов раст на цените на горивата.
„Мерката на Мицкоски не даде ефект. Само еден ден по прес-конференцијата на Мицкоски има ново покачување на цената на дизелот, кој сега изнесува 95,5 денари за литар“, изјави Кузеска.
Таа оцени дека граѓаните се соочуваат со раст на цените на основните производи и дека се создава „спирала“ на поскапувања.
„Проблемот за граѓаните е веќе тука – активирана е спиралата на раст на цените на храната. Маслото за јадење е над 100 денари, јајцата над 300 денари, овошјето и зеленчукот над 100 денари за килограм, месото е веќе покачено“, рече Кузеска.
Кузеска додаде дека платите не го следат растот на цените.
„Сѐ е поскапено, цените растат, а платите не мрдаат“, изјави таа.
Во однос на минималната плата, таа посочи дека Владата одбила да ја зголеми на 600 евра.
„Мицкоски одби да ја покачи минималната плата на 600 евра. Сега ниту 600 евра плата нема да бидат доволни за да се преживее месецот“, рече Кузеска.
Таа обвини и за, како што рече, „дефокус“ од страна на Владата.
„Наместо мерки – Мицкоски прави дефокус, Дубаи, Зграда 42 спрата, Харис Џиновиќ, Башановиќ, што ли не измислија“, изјави Кузеска, додавајќи дека „граѓаните не можат да живеат од дефокус“.
Кузеска ја критикуваше и изјавата на Мицкоски за наводни заштеди кај граѓаните.
„Дури Мицкоски зборува дека граѓаните ‘станале милионери’ и дека заштедиле, 200 илјади дневно, 1,5 милиони евра неделно. Епа граѓаните нека ги отворат своите паричници и нека ги пронајдат тие пари“, рече таа.
СДСМ повика Владата да ги прифати нивните предложени мерки.
„Намалување на ДДВ на горивата на 5%. Намалување на акцизите за 4 денари. 0% ДДВ за основните прехранбени производи. Преполовување на патарините. Законите се поднесени, мерките се реални и издржани – применете ги“, изјави Кузеска.
Таа нагласи дека, како што рече, станува збор за животниот стандард на граѓаните.
„Станува збор за најважното – за лебот, за џебот на народот, за тоа дали граѓаните ќе имаат храна да го преживеат месецот“, рече Кузеска.
