Приведен за убиството на 76-годишниот охриѓанец е 53-годишниот Жарко Гроздановски, анестезиолошки техничар од универзитетската клиника ТОАРИЛУЦ, објавија МВР и Јавното обвинителство.
Според информациите, безживотното тело на 76-годишниот К.М. било пронајдено вчера наутро во неговиот дом на улицата „Нада Филева“ во Охрид. Од МВР велат дека Гроздановски бил лишен од слобода вчера во 17:20 часот, откако претходно во полицијата било пријавено дека во куќата е пронајден мртов маж.
Од Министерството за внатрешни работи за „360 степени“ изјавиле дека станува збор за лице кое ѝ било познато на полицијата, но во евиденцијата имало само еден претходен случај. „Според официјалните податоци и евиденциите на СВР Тетово, досега против лицето Ж.Г. е евидентирано само едно кривично дело загрозување на сигурноста преку компјутерски систем. Освен овој конкретен случај, за лицето не постојат записи за други претходни санкции или кривични постапки со правосилен исход“, велат од МВР за „360 степени“.
Од Јавното обвинителство информираа дека денеска се преземаат дејствија за обезбедување докази поврзани со случајот и најавија дека во текот на денот ќе излезат со повеќе информации.
Гроздановски во јавноста е познат и како лидер на организацијата „Христијанско братство“. Против него, според објавените информации, во 2019 година била поднесена кривична пријава за упатување смртни закани кон тогашниот премиер Зоран Заев.
Тој и дел од членовите на „Христијанско братство“ учествуваа и во протестите што кулминираа со упадот во Собранието на 27 април 2017 година, како и во протестите против уставните измени во 2018 година.
