На 16 април 2026 година, со почеток во 20:00 часот, во просториите на Националната опера и балет во Скопје ќе се одржи ексклузивен концерт на Националниот џез оркестар под наслов „Cuban Jazz Explosion“. На овој значаен музички настан, домашниот оркестар ќе настапи заедно со светски реномираниот кубански музичар Алаин Перез и неговата осумчлена ритам-секција „La Orquesta“. Концертот е дел од големата европска турнеја „La Fiesta Tour“ и на публиката ѝ ветува незаборавна вечер исполнета со енергија и врвна изведба на спој помеѓу салса, тимба и џез музика.
Гостин на вечерта е Алаин Перез, мултиинструменталист, пејач и композитор кој ужива огромно светско признание како добитник на престижните награди „Grammy“ и „Latin Grammy“. Својата репутација ја градеше како член на легендарниот состав „Irakere“ на Чучо Валдес, како и преку долгогодишната соработка со фламенко-иконата Пако де Лусија. Во неговата богата кариера се вбројуваат соработки со музички великани од рангот на Чик Кореја, Винтон Марсалис, Селија Круз и Рубен Бладес, што го прави еден од најзначајните претставници на современата афро-кубанска музика денес.
Организатор на овој спектакуларен настан е НУ Оркестар за Џез Музика на РСМ, под раководство на директорот Гоце Стевковски.
