„Владата предводена од Христијан Мицкоски не презеде мерки за заштита на стандардот на граѓаните“ – со оваа порака СДСМ ја обвини актуелната власт за игнорирање на растот на цените во пресрет на велигденските празници.
Во партиското соопштение се наведува дека „ниту пред Велигден владата на Мицкоски не презеде никакви мерки што е директен удар врз семејниот буџет“, додавајќи дека граѓаните се оставени сами да се справуваат со скапотијата во период кога трошоците традиционално растат.
Од СДСМ велат дека Владата реагира доцна и без конкретни чекори. „Мицкоски ги остави граѓаните сами да се снаоѓаат токму во период кога трошоците се најголеми – пред Велигден. Додека семејствата се борат да обезбедат основни производи, Владата најавува мерки ‘по празниците’, чека анализи и извештаи“, се наведува во реакцијата.
Партијата тврди дека навремено предупредувала за растот на цените и предложила конкретни решенија. „СДСМ со недели предупредуваше и нудеше конкретни решенија – намалување на цените на горивата и храната, но Владата одлучи да ги игнорира. Денеска, граѓаните ја плаќаат цената на таа неодговорност“, стои во соопштението.
Како пример за, како што велат, влошената економска состојба, од СДСМ ја посочуваат ситуацијата на пазарите. „Реалноста на терен е поразителна. Велигденската трпеза е поскапа од кога било. Пазарите се полни, но торбите на граѓаните остануваат полупразни. Се купува минимално, ‘колку за проба’, а дел од граѓаните само разгледуваат без да можат да си дозволат“, наведуваат од партијата.
Во соопштението се изнесуваат и конкретни цени на дел од производите: „Јагнешкото месо достигнува и до 700 денари за килограм, поскапеа јајцата и зејтинот, а цените на доматите надминуваат 200 денари за килограм. Поскапувањата се речиси кај сите производи, со најголем раст кај овошјето и зеленчукот.“
Од СДСМ заклучуваат дека ваквата состојба е последица на, како што велат, погрешни политики на власта. „Ова е резултат на задоцнети, недоволни и погрешни економски политики затоа што Мицкоски го штити бизнисот и профитот наместо стандардот на народот. Власта нема чувство за реалноста, ниту за потребите на граѓаните“, се наведува во реакцијата.
