Камерниот оркестар „Профундис“ и истакнатата пијанистка Ема Попивода ќе настапат на свеченото отворање на меѓународниот фестивал „Мјуз-Екс Експо“ (Muse-X Expo Festival) во Тирана. Настанот ќе се одржи на 17 април во просторот на Пирамидата во Тирана, каде македонските уметници ќе претстават ексклузивен 40-минутен сценско-визуелен перформанс.
Овој настап претставува централен уметнички момент на фестивалот и ќе биде реализиран во соработка со оркестарот на РТШ. Концептот ги обединува класичната музика, современиот сценски израз и визуелните елементи, нагласувајќи ја креативната енергија на македонската музичка сцена.
Уметничкиот директор и диригент на „Профундис“, маестра Ѓурѓица Дашиќ, истакна дека овој настап е значајна можност за афирмација на оркестарот и позиционирање на македонските уметници на меѓународната сцена. Според неа, ваквите мултимедијални концепти покажуваат дека камерната музика може успешно да биде дел од современиот уметнички израз.
Фестивалот „Мјуз-Екс Експо“, кој трае од 17 до 19 април, е меѓународна платформа која ги поврзува музиката, визуелните уметности и креативните индустрии. Покрај концертната програма, настанот вклучува конференции и професионални средби на културни работници од повеќе земји.
Настапот во Тирана е уште една потврда за активното меѓународно присуство на „Профундис“, кој досега имал успешни претставувања на престижни фестивали во Италија, Србија, Бугарија и Црна Гора. Пијанистката Ема Попивода, која е и директорка на Македонскиот културен центар во Тирана, со овој проект продолжува со својот иновативен пристап во комбинирањето на музиката со визуелната уметност.
