Партијата „Прогресивна Бугарија“ на Румен Радев извојува повеќе од убедлива победа на собраниските избори во соседна Бугарија, со резултати кои значително ги надминаа сите претходни анкети. Според податоците на Централната изборна комисија (ЦИК) базирани на 68% од преброените гласови, партијата води со високи 44,5%, што ѝ овозможува самостојно да формира мнозинство во бугарскиот Парламент, пренесува во својата анализа Тони Поповски.
„Наспроти анкетите кои предвидуваа резултат од 27 – 30%, големото изненадување е дека на 68% од преброени гласови, според ЦИК, партијата води со дури 44.5%, резултат кој и обезбедува самостојно мнозинство“, истакнува Поповски во својата објава. Овие бројки се потврдени и од паралелните пребројувања на агенциите „Маркет Линкс“ и „Мјара“, кои на речиси целосно преброен примерок предвидуваат резултат меѓу 44,4% и 45,3%.
Успехот на Радев се припишува на неговата специфична предизборна реторика, која ги обедини социјалните прашања со патриотскиот прагматизам. Како што се наведува во анализата, победничката стратегија била фокусирана на државата како главен гарант на стабилноста, со заложби институциите да се заштитат од корупцијата и влијанието на олигархијата.
„Надворешната политика треба да биде внимателно балансирана (мирољубие, скептицизам кон ’тврдата‘ линија на Западот, особено кога станува збор за безбедносни прашања и односите со Русија)“, се наведува како дел од клучните позиции на Радев. Со ваквиот настап, „Прогресивна Бугарија“ успеа да привлече огромен дел од гласачите кои претходно ги поддржуваа русофилската „Вазраждане“ и Бугарската социјалистичка партија (БСП), кои сега се наоѓаат на работ на изборниот праг.
Второто големо изненадување на изборите е сериозниот пораз на ГЕРБ-СДС на Бојко Борисов, партија која на претходните избори во октомври 2024 година беше победник. Сега, со освоени околу 13,1%, ГЕРБ бележи драматичен пад во споредба со претходните 25,52% од гласовите.
Во новиот состав на Народното собрание се очекува да учествуваат вкупно четири политички субјекти:
„Прогресивна Бугарија“ со доминантно водство.
Центристичката коалиција „ПП-ДБ“ со околу 14% од гласовите.
ГЕРБ-СДС со околу 13,1%.
„ДПС – Ново начало“ на Дељан Пеевски со 5,4%.
Според проценките на агенциите за паралелно пребројување, партијата „Вазраждане“ се наоѓа во неизвесна позиција со рејтинг меѓу 3,8% и 4,2%, што го прави нејзиниот влез во парламентот крајно неизвесен со оглед на изборниот праг од 4%.
Падот на поддршката е евидентен и кај партијата на Пеевски, која во 2024 година имаше двојно подобар резултат, наведува Поповски.
