Изградбата на автопатот Прилеп–Битола се одвива со добра динамика и се очекува да биде завршена во предвидениот рок до 2029 година, но проектот се соочува со сериозна опструкција во околината на Прилеп. Вицепремиерот и министер за транспорт, Александар Николоски, информираше дека група граѓани ја блокираат работата во месноста Ореовец, штитејќи „диво изградени хациенди со базени“, со што директно му штетат на државниот буџет.
Според Николоски, овие лица не му дозволуваат на државниот изведувач да пристапи до наоѓалиштето на материјал, додека истовремено дозволуваат непречена работа на приватен каменолом во соседството. Министерот посочи на двојни аршини кај демонстрантите, кои тврдат дека камионите што работат за државата предизвикуваат бучава и загадување, додека камионите на приватниот изведувач не им претставуваат проблем.
Финансиските последици од оваа блокада се огромни и достигнуваат до 100 милиони евра. Вицепремиерот појасни дека поради неможноста да се користи сопствено наоѓалиште, државата сега е принудена да купува материјал од приватни каменоломи и дополнително да плаќа за негов транспорт, што значително ги зголемува трошоците за изградба на автопатот.
„Ако овие пари ги вложиме во проекти за Могила, Новаци, Прилеп, Битола, Кривогаштани и Крушево, ќе се трансформира целиот регион, а сега треба да ги даваме по приватни џебови“, истакна Николоски. Тој додаде дека е недозволиво интересот на неколку сопственици на нелегални објекти да биде над интересот на целиот Пелагониски регион.
Министерството за транспорт очекува блокадата кај Ореовец да биде отстранета во најбрзо време за да се овозможи непречена работа на трасата. Николоски нагласи дека државата нема да дозволи стратешките инфраструктурни проекти да бидат заложници на поединечни интереси, особено кога станува збор за објекти кои се изградени на диво.
„Очекувам во најбрзо време да се отстрани таа блокада и да почнеме да работиме“, заклучи вицепремиерот. Проектот за автопатското поврзување меѓу Прилеп и Битола останува еден од врвните приоритети на владата, со цел модерна патна инфраструктура која ќе го поттикне економскиот развој на овој дел од државата.
