Претседателот на СДСМ, Венко Филипче, денеска во Собранието на дебатата „Улогата на Собранието во процесот на пристапување во ЕУ“, во организација на Институтот за европска политика (ЕПИ), упати остри критики до владата на Христијан Мицкоски, обвинувајќи ја за свесно запирање на европскиот пат на државата. Коментирајќи ја последната изјава на премиерот дека земјата е подготвена да чека и со децении за влез во Унијата, Филипче истакна дека тоа е експлицитна потврда оти оваа извршна власт нема да направи ниту еден суштински чекор кон Европа.
„Вистината е разочарувачка. Немојте да очекувате ништо од европскиот пат додека е оваа влада на сцена. Самиот премиер јавно кажа дека, ако треба, децении ќе чекаме. Тоа е признание дека тие воопшто немаат план, ниту желба за интеграција“, изјави Филипче за време на денешниот настан.
Реформската агенда во застој: Од 10 закони, донесен само еден
Како клучен доказ за институционалната пасивност, Филипче ја посочи реформската агенда во правосудството. Тој нагласи дека во текот на 2025 година владата требала да предложи десетина клучни закони, но до Собранието стигнал и бил донесен само еден, и тоа со делумно имплементирани препораки од оценската мисија на ЕУ.
„Собранието не може да направи ништо кога Владата не продуцира материјали. Реформските закони едноставно не стигнуваат до комисиите. Овие закони се директно врзани со финансиска поддршка од Европа која сега е под знак прашалник поради неработењето на министерствата“, појасни лидерот на опозицијата.
Игнорирана понудата за соработка на реформите
Филипче откри дека по понудата за заедничка работа на реформската агенда, СДСМ преку работна група испратил стручни, експертски мислења за законите во правосудството до Министерството за правда, но оттаму нема никаков одговор. Според него, ова покажува дека власта не е заинтересирана за политички консензус, туку за одржување на статус-кво состојба.
„Додека не се смени оваа влада, ние нема да направиме никаков чекор напред. Реформите се заглавени во Министерството за правда, а одговори на нашите експертски предлози едноставно нема. Вистината е дека оваа влада работи на изолација, а не на интеграција“, заклучи Филипче.
