Општина Центар в понеделник, на 27 април, со почеток во 17:00 часот, ќе организира културен настан кај спомен-клупата на Горан Стефановски во Дебар Маало, посветен на роденденот на еден од најзначајните македонски драмски автори. Настанот има за цел да го одбележи неговото творештво и неизбришливата трага што ја остави во македонската култура.
Градоначалникот Горан Герасимовски упати отворена покана до сите граѓани и почитувачи на ликот и делото на Стефановски да се придружат на ова чествување низ уметност, музика и спомени.
Посебен акцент на настанот ќе даде неговиот син, Игор Стефановски, кој како домаќин ќе сподели лични приказни за родендените славени во кругот на семејството, како и за специфичниот хумор и идеите на големиот писател.
Програмата е конципирана да ги спои сите уметности во кои Стефановски уживаше и кои ги инспирираше:
Музика: Хорот „Мирче Ацев“ ќе ги изведе неговите омилени песни, а предвидени се настапи на џез формацијата „Трицикл“ и DJ сет на Шурбе.
Театар: Актери ќе интерпретираат култни монолози од неговите драмски текстови.
Ликовна уметност: Посетителите ќе можат да погледнат изложба на портрети од Горан, насликани од уметникот Ненад Рафајловски.
Општина Центар веќе неколку години во континуитет го негува споменот на Горан Стефановски преку уредување на уметнички катчиња и реализација на вакви собири во срцето на Дебар Маало, маалото кое тој најмногу го сакаше и опишуваше. Овој настан е продолжување на таа традиција, со цел неговиот дух да остане жив во културниот пулс на Скопје.
