По бруталното убиство на 31-годишната жена во Битола, која утринава беше усмртена со нож од нејзиниот сопруг, граѓанските организации преку заедничко соопштение најостро го осудија новиот фемицид. Тие алармираат дека институционалната заштита е недоволна и дека државата станува сè поопасно место за живеење за жените.
Националната мрежа против насилство врз жени и семејно насилство, Платформата за родова еднаквост и Мрежата за заштита од дискриминација посочуваат дека ова не е изолиран случај, туку загрижувачки континуитет на насилство во 2026 година.
„И покрај постојаните измени на закони, стратегии и политики, во практика нема суштинско подобрување во заштитата на жртвите. Наместо ефикасна превенција, брза реакција и координирана институционална заштита, повторно сведочиме на загубени животи. Ова е последица на слаба проценка на ризик, бавни институционални реакции и култура на неказнивост“, се наведува во заедничката реакција на организациите.
Невладиниот сектор бара итна, темелна и транспарентна истрага за случајот во Битола, со посебен фокус на тоа дали претходно имало пријави за насилство. Доколку се утврдат системски пропусти, тие инсистираат на индивидуална одговорност и санкции за секое службено лице што не постапило согласно законските обврски.
Во соопштението се изразува и сериозна загриженост за порастот на врсничкото насилство во училиштата, вклучително и нападите со ладно оружје кои завршија со ученици во критична состојба, оценувајќи дека насилството во државата прераснува во сериозна општествена епидемија.
Како итно решение, организациите бараат финансиски инвестиции во специјализирани сервиси за жртви низ целата држава, како и зголемување на професионалните ресурси во МВР и центрите за социјална работа. Покрај тоа, се бараат сериозни инвестиции во образованието и превентивни програми за младите.
„Животот на жените и децата не смее да завршува како статистика поради институционално непостапување и системски пропусти“, децидни се од граѓанскиот сектор.
