Јавното претпријатие „Комунална хигиена-Скопје“ и оваа година зеде активно учество во масовната еколошка акција за чистење „Генералка викенд“, која се одржа на 8 мај. Во рамките на оваа акција, екипите на претпријатието транспортираа вкупно 200 кубни метри отпад од територијата на градот Скопје.
Како што информираат од претпријатието, акцијата започнала на Кејот на реката Вардар, опфаќајќи ги двете страни на речното корито. Таму, стотици учесници собирале најразлични видови на непрописно одложен отпад од брегот и од пешачките патеки.
Масовното чистење паралелно се одвивало и низ сите скопски општини. Учесниците го одлагале насобраниот отпад на посебно одредени пунктови, претежно лоцирани во близина на образовните институции, односно градинките и училиштата. По завршувањето на акцијата, целиот отпад бил преземен и безбедно транспортиран од страна на екипите на ЈП „Комунална хигиена-Скопје“.
Од претпријатието ја изразуваат својата подготвеност за континуирано учество во сите иницијативи и активности кои придонесуваат за заштита на животната средина и јавното здравје.
