Новинарот Фуркан Салиу преку објава на социјалните мрежи упати жестоки критики за владеењето на ВМРО-ДПМНЕ во изминатите две години, обвинувајќи ја партијата за сериозно уназадување на демократските процеси, економијата и меѓуетничките односи во државата.
Во својата реакција, Салиу набројува низа, според него, негативни ефекти од политиките на власта. Тој тврди дека за само две години ВМРО-ДПМНЕ успеала да ја врати меѓуетничката омраза и да отвори теми кои, како што посочува, биле затворени уште со воениот конфликт.
Дополнително, новинарот ја обвинува владејачката партија за блокирање на евроинтегративниот пат на земјата, како и за партизација на судството и обвинителството. Осврнувајќи се на состојбата во општеството, тој посочува дека власта ги извадила студентите на улица, потсетувајќи дека претходно долг период протестирале и македонските студенти.
Особено загрижувачко, според Салиу, е замолчувањето на јавната критика. Тој тврди дека речиси сите критички медиуми во земјата се „избришани“.
Оваа ситуација, оценува новинарот, произведува нестабилна политичка состојба која директно се одразува на економијата преку намалување на странските инвестиции. На меѓународен план, Салиу смета дека економските интереси ја оставиле земјата со само двајца бизнис-политички сојузници, од кои „едниот веќе е минато, а другиот е на пат да стане минато“. Според него, ваквата надворешна политика создава нови непријателства со помоќните држави.
„Тие можат да ве лажат дека и сами ќе опстанеме, само за да добијат избори, но кога ќе ве удри шлаканицата на реалноста, тогаш ќе биде доцна“, предупредува Салиу на крајот од својата објава, прашувајќи јавно дали таквото владеење е вистински патриотизам и љубов кон државата.
Ј. Ѓ.
