Нервозата што Уставниот суд ја предизвикува кај политичките фактори, Владата и Собранието е доказ дека Судот излегол од летаргијата и повеќе не е лојална институција во чија сенка политичарите можат да уживаат. Ова го истакнува претседателот на Уставниот суд, д-р Дарко Костадиновски, во опсежно интервју за „Нова Македонија“, во кое отворено зборува за политичките притисоци, манипулациите во јавноста и актуелните предмети.
Според Костадиновски, во изминатите две години Уставниот суд покажал бескомпромисност и храброст, што очекувано предизвикало реакции кај извршната и законодавната власт.
„Кога политиката сака послушен суд, тогаш има проблем со Уставот, а не со судиите! Резултатот од послушен Уставен суд доведе до состојба на големи предизвици со владеењето на правото и недоверба кај граѓаните“, дециден е Костадиновски, порачувајќи дека судиите не смеат да носат прифатливи, туку исправни одлуки.
Нова платформа против лажните вести и манипулации
Како одговор на јавните притисоци и дезинформациите кои се пласираат од одредени политички центри, претседателот на Судот најави активирање на новата комуникациска платформа „Дознај факти од Уставен суд“. Проектот ќе стартува следната недела и има за цел да им понуди на граѓаните точни и официјални информации, со цел да се спречи политичкото манипулирање со одлуките.
Како класичен пример за таква манипулација, Костадиновски ги посочува шпекулациите околу Законот за употреба на јазиците.
„Тешка лага и манипулација е дека Уставниот суд ќе го поништел или ќе го укинел албанскиот јазик. Не, тоа не е вистина! Уставниот суд може само да помогне кој било закон да биде појасен, попрецизен и усогласен со Уставот“, појаснува тој. Доцнењето на овој предмет, според него, се должи на објективни околности и повеќегодишното некомплетирање на Судот, најавувајќи дека предметот ќе биде решен штом ќе се избере и деветтиот судија.
„Бадентер“ не смее да важи за судовите
На прашањето за евентуално воведување на одлучување по Бадентеровиот принцип во судството, Костадиновски е категоричен дека тоа би била погрешна одлука.
Алатка за политичари, не за судии: Тој смета дека „Бадентер“ е алатка за политичките органи како Собранието, додека во Уставниот суд одлуките мора да се обликуваат исклучиво според правни, а не според политички или етнички аргументи.
Осврнувајќи се на катастрофалната доверба од само два отсто во правосудството, тој посочува дека тоа е резултат на децениската доминација на извршната власт врз сите останати власти, што довело до партизација на системот и слаби институции.
Очекувања за „Протоколот 2“
Во однос на актуелниот предмет поврзан со оспорувањето на Протоколот број 2 (документот потпишан со Бугарија), претседателот на Уставниот суд потврди дека се работи за жив предмет по кој интензивно се постапува. Тој откри дека во моментов Судот е во исчекување на официјалните мислења од Владата и од Министерството за надворешни работи, кои ги смета за особено значајни пред донесувањето на конечната одлука.
И покрај скромниот буџет од околу 100 милиони денари, Костадиновски најавува зголемена ефикасност на институцијата, потенцирајќи дека само во првата половина од годинава веќе се отворени околу 200 предмети, што е доказ за растот на свесноста и довербата на граѓаните во Уставниот суд како последна брана на правната држава.
