Арне Слот ја напушти позицијата главен тренер на Ливерпул по разочарувачката втора сезона на чело на тимот, официјално соопшти клубот. Слот го предводеше Ливерпул до титулата во Премиер лигата во својата дебитантска кампања, но не успеа да го надоврзе тој успех и покрај рекордното трошење во летниот преоден рок.
Ова доведе до одлуката Холанѓанецот да ја напушти својата улога, а Ливерпул сега активно бара негова замена. Во соопштението на клубот се вели: „ФК Ливерпул може да потврди дека Арне Слот ја напушта улогата на главен тренер со моментален ефект и дека процесот за назначување наследник е во тек“.
Рекордно трошење и историски негативен рекорд
Со над 445 милиони фунти потрошени за засилувања, вклучувајќи ги и британските рекордни трансфери на Александар Исак и Флоријан Вирц, очекувањата беа дека „Црвените“ повторно ќе се борат за највисоките почести. Наместо тоа, Слот забележа најмногу порази во една сезона за Ливерпул уште од далечната 1953/54 година (вкупно 20 порази).
Откако заврши на третото место во лигашката фаза од Лигата на шампионите, Ливерпул оствари вкупна победа од 4-1 над Галатасарај во осминафиналето, но потоа доживеа дебакл и беше поразен со вкупни 4-0 во двата натпревари од Пари Сен Жермен во четвртфиналето.
Раната елиминација во четвртото коло на Карабао Купот беше проследена со пораз од Манчестер Сити во четвртфиналето на ФА Купот, при што Слот постојано укажуваше на калибарот на противниците од кои неговиот тим губеше. Иако финишот во Премиер лигата им обезбеди фудбал во Лигата на шампионите за следната сезона, тоа не беше доволно да се спаси работата на Слот.
Незадоволство кај навивачите и тензии во соблекувалната
Отказот дојде по жестокото противење од навивачите кои го исвиркуваа Слот во неколку наврати, при што многумина беа фрустрирани од неинспиративниот стил на фудбал на 47-годишниот стратег и неговиот перципиран пасивно-агресивен став во медиумите.
Пукнатините вистински се појавија кога Мохамед Салах, кој заминува од клубот, упати прикриена критика за тренерската работа на Слот во објава на социјалните мрежи по поразот од Астон Вила со 4-2 на последниот гостински натпревар сезоната. Коментарите на Египќанецот беа „лајкувани“ од неколку негови соиграчи, што се протолкува како знак дека главниот тренер ја загубил контролата врз соблекувалната.
Дали тоа навистина било така веројатно нема да се дознае наскоро, но Слот очигледно ја загуби довербата кај управниот одбор, при што „Фенвеј Спортс Груп“ (FSG) дејствуваше одлучно пред летото во кое тој ќе влезеше во последната година од договорот.
Андони Ираола, Себастијан Хенес и Луис Енрике се споменуваат како рани кандидати за преземање на клупата на Ливерпул, иако засега нема никакво назначување.
Изјава од сопствениците на Ливерпул
Во заедничката изјава, сопствениците на Ливерпул напишаа:
„Дека ова беше тешка одлука за нас како клуб, се подразбира. Придонесот што Арне го даде за ФК Ливерпул во времето што беше со нас беше значаен, смислен и – што е најважно од сè за навивачите и за нас самите – успешен.
Како таква, нашата благодарност за сè што постигна не би можела да биде поголема, особено бидејќи беше поткрепена со работна етика, трудољубивост и ниво на стручност што дополнително го нагласи нашиот став дека тој е лидер во својата област.
Од моментот кога првпат се сретнавме со Арне, веднаш беше јасно дека тој е поединец кој не само што ја прифаќа одговорноста, туку ја прегрнува. Ова беше евидентно кога тој се согласи да ја преземе функцијата главен тренер, кога нè одведе до титулата во Премиер лигата и во текот на сезоната која штотуку заврши кога се соочи со значителни предизвици и товари.
Во исто време, ние колективно дојдовме до заклучок дека промената е неопходна за клубот да продолжи да се движи напред. Повторно, мора да се нагласи дека ова не е одлука која е донесена лесно, напротив.
Би сакале да ја искористиме оваа прилика да ја забележиме нашата благодарност за Арне, кој секогаш ќе има посебно место во историјата на овој фудбалски клуб како тренер кој ја донесе 20-тата лигашка титула на Ливерпул.
Тоа достигнување – направено уште позабележително бидејќи пристигна во неговата прва сезона на чело – се градеше на извонредно тренирање и лидерство секој божји ден.
Тој, исто така, помогна да се води клубот низ еден од најтешките периоди што може да се замислат по загубата на Диого. Сочувството и хуманоста што ги покажа во тоа време кажуваат многу за него како личност.
Како такви, можеме само да му посакаме добро на Арне во следната фаза од неговата тренерска кариера, со наше очекување дека тој ќе продолжи да биде успешен. Го правиме тоа со знаење дека неговото наследство во Ливерпул е недопрено и ќе стане уште позначајно во годините и децениите што доаѓаат.
Сепак, заклучокот до кој дојдовме се гради на верувањето дека траекторијата на тимот најдобро се решава преку промена на правецот. Тоа не ја намалува работата што Арне ја заврши тука, ниту почитта што ја имаме кон него. Ниту пак е одраз на неговите таленти. Наместо тоа, укажува на потребата од поинаков пристап.
Арне си заминува со нашата благодарност, со титула во Премиер лигата зад своето име и со знаење дека тој и неговото семејство секогаш ќе бидат добредојдени назад на Енфилд.“
Ј. Ѓ.
