Опозицискиот СДСМ преку официјално соопштение реагираше на последните пораки од Брисел, тврдејќи дека од највисоко европско ниво пристигнале јасни и недвосмислени потврди кои ги разобличиле месечните лаги и манипулации на премиерот Христијан Мицкоски пред граѓаните.
Од партијата потенцираат дека претседателот на Европскиот совет, Антонио Кошта, испратил јасна порака дека уставните измени се единствениот услов за формално отворање на преговорите со Европската Унија, со што целосно се потопени тврдењата на власта.
Во исто време, СДСМ посочува на извештајот за земјава од Томас Вајц, кој неодамна беше усвоен од Комитетот за надворешни работи на Европската комисија.
„Во извештајот се констатира недоволен напредок во реформите, особено во владеењето на правото, правосудството и борбата против корупцијата. Ова е директна потврда дека Владата на Мицкоски не спроведува реформи. Наместо независни институции, сведочиме на политички притисоци врз правосудството, јавно мешање во работата на обвинителството и обиди за партиска контрола“, реагираат од опозицијата.
Обвинувања за организирани дезинформации по српски пример
Од СДСМ додаваат дека во извештајот на Вајц дополнително се предупредува на странско непријателско влијание и кампањи за дезинформации кои директно ја поткопуваат домашната демократија. Според опозицијата, тоа докажува дека антиевропските наративи и евроскептицизмот во земјава не се случајни.
Партијата тврди дека станува збор за организирана кампања креирана по примерот на српскиот претседател Александар Вучиќ и сестринската партија на ВМРО-ДПМНЕ, Српската напредна странка (СНС).
„Додека Мицкоски и неговата пропагандна машинерија шират стравови и лаги за наводно загрозување на идентитетот, јазикот и културата, вистинската цел е да се задржи државата во изолација и да се спречи европската интеграција. Лажниот патриотизам служи само како параван за неспособноста, корупцијата и отсуството на реформи“, се вели во партиското соопштение.
Заедничкиот документ на Берлин и Париз ги потврдува критериумите
Како дополнителен аргумент за своите тврдења, СДСМ го наведува и последниот заеднички документ (position paper) на владите во Берлин и во Париз, каде што во фокусот се ставени токму Копенхашките критериуми. Од партијата подвлекуваат дека овој документ јасно нотира оти без реформи и без исполнување на единствениот услов за внесување на малцинствата во Уставот, нема и не може да има продолжување на преговорите со Унијата.
На крајот од соопштението, СДСМ заклучува дека со актуелната власт на ВМРО-ДПМНЕ државата е заглавена и нема напредок кон Европа ниту подобрување на животниот стандард, завршувајќи со повикот „Реформи сега. Европа сега“.
