Опозицискиот СДСМ преку соопштение упати остри критики кон премиерот Христијан Мицкоски, обвинувајќи го дека го искористил најголемиот државен празник Илинден за да ја продолжи поделбата на народот.
Од партијата реагираат на илинденскиот говор на премиерот во кој тој повикал на борба против омразата, цинизмот и „талогот што ја трујат Македонија“. СДСМ прашува кој е тој „талог“, оценувајќи дека за Мицкоски тоа се сите што не мислат како него, кои ја разобличуваат неговата политика и кои бараат Европа, правда и одговорност.
СДСМ обвинува дека на денот кога треба да се слави државноста и единството, премиерот повторно сее поделба и навредува. Истовремено, опозицијата ја критикува и надворешната политика на власта, поврзувајќи ја со гостувањето на функционери од соседна Србија.
„Во исто време, додека зборува против ‘талогот’, неговата Влада ги пречекува функционерите на Вучиќ – претставници на политиката од деведесеттите, на војните и на заговарањето на етничко чистење. Луѓе што отворено зборуваат за етничко чистење и што доаѓаат како емисари на ‘српскиот свет’. Ова не е патриотизам. Ова е политичка омраза облечена во празничен говор“, стои во реакцијата на СДСМ.
Според партијата, Мицкоски не може да биде премиер на сите граѓани додека народот го третира како „талог“.
Од СДСМ заклучуваат дека додека премиерот дели и навредува, Македонија стои во место без реформи, без отворени кластери, во изолација и со граѓани кои со часови чекаат на границите, оценувајќи дека Мицкоски ја претворил борбата за слобода во борба против сопствениот народ.
