Хирошима денеска ја одбележа 81-годишнината од американското атомско бомбардирање со повик до светските лидери да престанат да го оправдуваат поседувањето нуклеарно оружје како средство за одвраќање и да преземат конкретни чекори кон негово целосно укинување, објави агенцијата Асошиејтед прес. На комеморацијата во Меморијалниот парк на мирот присуствуваа околу 50.000 луѓе, меѓу кои и претставници на приближно 120 држави и региони.
Точно во 8 часот и 15 минути по локално време, во моментот кога на 6 август 1945 година над градот експлодирала атомската бомба фрлена од американскиот бомбардер Б-29, присутните одржаа едноминутно молчење, додека во паркот одекнуваше Ѕвоното на мирот.
Градоначалникот на Хирошима, Казуми Мацуи, во годишната Декларација за мир предупреди дека намалувањето на значењето на нечовечката природа на нуклеарното оружје и прифаќањето на силата како средство за остварување политички и економски интереси може да предизвика нов круг насилство и одмазда.
„Политичари на светот, граѓанското општество бара итно укинување на нуклеарното оружје. Уште колку долго имате намера да нè разочарувате?“, порача Мацуи на церемонијата.
Тој оцени дека премногу политички лидери сè уште го претставуваат нуклеарното одвраќање како реалистична безбедносна политика, со што, според него, дополнително се оддалечува можноста за создавање свет без нуклеарно оружје. Мацуи ги повика државите да дејствуваат преку мултилатерални механизми и самите да дадат пример во процесот на нуклеарно разоружување и неширење на оружјето.
Повик до младите да го продолжат сведоштвото
Градоначалникот ги повика и помладите генерации да ги зачуваат сеќавањата на преживеаните, познати како хибакуша, и укинувањето на нуклеарното оружје да го претворат во општоприфатена цел на меѓународната заедница.
Бројот на преживеани од атомските напади врз Хирошима и Нагасаки се намалил на околу 91.000, а нивната просечна возраст надминала 86 години. Поради тоа расте загриженоста дека непосредните сведоштва за последиците од нападите постепено ќе исчезнат.
Во регистарот на жртвите во Хирошима годинава биле додадени уште 4.393 имиња на лица чија смрт била потврдена во изминатата година. Со тоа вкупниот број имиња запишани во меморијалниот регистар достигнал 353.639.
Јапонија ја потврди политиката без нуклеарно оружје
Јапонската премиерка Санае Такаичи, која првпат присуствуваше на церемонијата во функција на премиер, изјави дека Јапонија ќе продолжи да работи за свет во кој нуклеарното оружје никогаш повеќе нема да биде употребено.
Таа ги потврди трите повоени ненуклеарни принципи на земјата: Јапонија да не произведува, да не поседува и да не дозволува внесување нуклеарно оружје на својата територија. Сепак, во земјата се води дебата за можна ревизија на дел од оваа политика поради влошените безбедносни услови во регионот и потпирањето на американскиот нуклеарен чадор.
Јапонија досега не се приклучила кон Договорот за забрана на нуклеарното оружје. Мацуи ја повика владата барем да учествува како набљудувач на следниот состанок на земјите потписнички на договорот.
Гутереш: Нуклеарните закани повторно се користат како средство за принуда
Генералниот секретар на Обединетите нации, Антонио Гутереш, во писмена порака предупреди дека меѓународните норми и заштитни механизми што со децении спречувале нуклеарна катастрофа се под сè поголем притисок.
Тој порача дека ужасот на нуклеарното оружје е само една од лекциите на Хирошима, а другата е потребата да се изгради свет во кој заканата или употребата на такво оружје ќе станат незамисливи. Гутереш ги повика државите да изберат дијалог наместо поделби, соработка наместо конфронтација и заедничка безбедност наместо тесни национални интереси.
(Автентичен јапонски филм запленет по војната, со последиците од нападите врз двата града.)
На 6 август 1945 година, американскиот бомбардер „Енола Геј“ ја фрлил ураниумската бомба „Малото момче“ врз Хирошима. Се проценува дека до крајот на истата година од експлозијата, повредите и последиците од радијацијата починале околу 140.000 луѓе.
Три дена подоцна, втора атомска бомба била фрлена врз Нагасаки, каде што загинале околу 70.000 луѓе. Јапонија ја објавила својата капитулација на 15 август 1945 година, со што завршила Втората светска војна.
Ј. Ѓ.
