Лидерот на СДСМ, Венко Филипче, и премиерот Христијан Мицкоски влегоа во нова жестока политичка пресметка, разменувајќи тешки обвинувања околу начинот на кој се води државата. Дебатата се разгоре околу фразата „не сме исти“, при што опозицискиот лидер ја обвини власта за криминално владеење и негрижа за граѓаните, додека премиерот возврати дека нема намера да се споредува со луѓе што ја ограбиле Македонија.
Во интервју за телевизија Сител, претседателот на СДСМ, Венко Филипче, истакна дека разликата меѓу двете партии е дијаметрално спротивна.
„Не сме исти со организираната криминална група на Христијан Мицкоски. Ние сакаме напредна држава во којашто секој ја гледа иднината, а не ја гледаме државата како што тие ја гледаат – како плен“, изјави Филипче.
Тој најави дека СДСМ во септември ќе промовира „Мастер план за Македонија“ кој ќе содржи конкретни решенија за подобрување на стандардот, платите и пензиите, критикувајќи ја власта дека во време на криза не штити ниту една категорија граѓани, а планира набавка на нов владин авион.
Филипче посебно се осврна на затворањето на истрагата за модуларната болница во Тетово, нагласувајќи дека Обвинителството потврдило оти немало злоупотреба на службената должност ниту штета на Буџетот. Тој побара извинување од Мицкоски кон семејствата на загинатите, обвинувајќи го дека пет години ја користел трагедијата за политички поени и водење црна кампања. Лидерот на СДСМ ги отфрли шпекулациите за политички договор за затворање на случајот како целосно апсурдни, додавајќи дека заканите од премиерот се само одраз на „слабост и страв“.
На овие прозивки, реагираше премиерот Христијан Мицкоски. Одговарајќи на новинарско прашање за коментарот на Филипче дека „не се исти“, Мицкоски изјави дека по тоа прашање целосно се согласува со лидерот на опозицијата.
„Јас можам за прв пат да се сложам со претседателот на СДСМ дека не сме исти. Јас никогаш не би сакал да бидам ист со куклата на луѓето кои ја уништија и ограбија Македонија. Ниту во најлошиот сон не би сакал тоа да бидам“, порача Мицкоски.
Премиерот заклучи дека граѓаните можат многу јасно да направат разлика помеѓу актуелната Влада предводена од ВМРО-ДПМНЕ и раководството на СДСМ, кое, според него, е водено од „куклата на оние кои ја уништија државата“.
