По повеќе од две децении ветувања, денеска официјално започна изградбата на автопатот Скопје – Блаце, проект кој премиерот Христијан Мицкоски го оцени како историски момент за државата. На настанот, на кој присуствуваа високи државни претставници, меѓу кои претседателот на Собранието Африм Гаши и косовскиот премиер Албин Курти, Мицкоски истакна дека оваа делница ќе донесе подобра економија, побрз транспорт и засилена размена меѓу Северна Македонија и Косово. Тој изрази посебно задоволство што градежните работи ќе ги изведува македонска компанија, што ќе значи дополнителна додадена вредност за домашната економија и нови работни места.
Премиерот најави дека инфраструктурната офанзива нема да застане тука и дека наскоро ќе започне изградбата на уште една автопатска делница од Букојчани до Кичево. Со тоа, како што нагласи Мицкоски, за првпат во историјата на државата истовремено ќе се градат дури шест автопатски делници, вклучувајќи ги Блаце – Скопје, Тетово – Гостивар, Гостивар – Букојчани, Букојчани – Кичево, Кичево – Охрид и Прилеп – Битола.
Во своето обраќање, Мицкоски порача дека со градењето патишта се гради и иднината на младите, со цел тие да останат во татковината, а оние кои заминале да се вратат дома. Според него, патриотизмот во 21 век не претставува националромантизам, туку силна економија, добар животен стандард, задоволни граѓани, владеење на правото и бескомпромисна борба против криминалот и корупцијата.
