Трагедиите со човечки жртви и состојбите во правосудството предизвикаа остра меѓупартиска пресметка. Опозициската СДСМ денеска излезе со тврдење дека „правдата за Кочани се топи пред очите на јавноста“ поради партизирано судство, на што реагираа од владејачката ВМРО-ДПМНЕ со став дека опозицијата прави „груба политичка злоупотреба на трагедијата во Кочани“ и применува двојни стандарди.
„Осумнаесет месеци по трагедијата во кочанската дискотека „Пулс“, во која животот го загубија 63 млади лица, а 193 беа повредени, а вистинска одговорност сè уште нема. Правдата за Кочани се топи пред очите на јавноста, а заробеното судство кое е под целосна контрола на Мицкоски ги штити своите, оставајќи ги жртвите и нивните семејства без одговори“, изјави на денешната прес-конференција портпаролката на партијата, Богданка Кузеска.
Според партијата, наместо брза и неселективна одговорност, постапките се одолжуваат, а се ослободуваат лица поврзани со случајот, при што се посочува дека и „Газда Деко е пред слобода“. СДСМ потсети на изјавата на премиерот Христијан Мицкоски дека ќе се повлече од политиката доколку се докаже дека обезбедувањето во дискотеката е поврзано со ВМРО-ДПМНЕ, обвинувајќи го дека излажал и не понел одговорност.
Кузеска обвини дека власта повеќе од две години ги контролира полицијата, обвинителството и судството, диктирајќи задачи на судии и обвинители преку телефон и телевизија, додека во судскиот совет се поставуваат партиски кадри. Од СДСМ оценуваат дека одолжувањето на правдата за Кочани не е изолиран случај, туку систем, посочувајќи на ослободувањето на Никола Груевски и Драган Павловиќ-Латас, неказнивоста на владини телохранители, како и отсуството на одговорност за криминални тендери, шверц со дрога и претепувањето млади во Ново Село.
Партијата бара целосна и неселективна одговорност за сите кои дозволиле, овозможиле или прикривале незаконско работење во објектот, потенцирајќи дека никој не смее да биде заштитен поради партиска книшка или функција.
Во писмената реакција на ВМРО-ДПМНЕ се наведува дека СДСМ нема никаков морален кредибилитет да држи лекции за правда додека молчи и никој не одговара за 14-те изгубени животи во пожарот во модуларната болница во Тетово. Владејачката партија директно го посочи претседателот на СДСМ и поранешен министер за здравство, Венко Филипче, обвинувајќи го дека носи политичка одговорност за системот во чие време се случи трагедијата и дека тој е амнестиран преку корумпираните судии и обвинители избрани во Зајас и Струмица. Од партијата додаваат дека Филипче енормно се богател за време на кризата. ВМРО-ДПМНЕ побара опозицијата да престане со собирање дневнополитички поени врз грбот на жртвите од Кочани, нагласувајќи дека време е да се стави крај на партиските послушници во правосудството и дека правдата мора да важи подеднакво за сите.
