Невработените кумановци, корисници на гарантирана минимална помош, покажеле значителен интерес за обуката за побарувани занимања, соопштија денеска надлежните од Центарот за вработување во Куманово.
-Огласот за спроведувачи на обука од страна на ИПА проектот беше објавен преку Центарот за образование на возрасни. Спроведувачи на обуки на подрачјето на Куманово се техничкото училиште „Наце Буѓони“ за негувател на стари и немоќни лица, за службеник во книговодство е образовниот центар „Визија“ и за фризер е приватната фирма „Славе пром“ односно фризерското студио“ Нате“. Обуките почнаа од 10 декември, а во тек е теоретскиот дел во кој се вклучени 23 лица од редот на корисниците на гарантирана минимална помош, изјави раководителката на Центарот Марија Димитријевска.
Таа додава дека има голем интерес за оваа мерка и оти се пријавиле 41 лице. Некои се откажале од објективни лични причини, но има и обуки како оние за негувател на стари и немоќни лица каде поради пандемијата, е ограничен бројот на десет лица во група или за обуките за книговодител и фризер каде бројот е ограничен на девет лица.Надлежните ги повикаа рабодавачите да ги користат мерките за обука што секоја година се предвидени во Оперативниот план на Агенцијата за вработување.
-Има обуки за познат работодавец, за стручни квалификации за потребите на работодавците и обука за побарувани занимања каде и работодавците од приватниот сектор може да се јават како верификувани спроведувачи на обука. Сè што е потребно е да изготват програма која преку Центарот за образование на возрасни ќе се верификува и на тој начин работодавците преку обуките што ќе ги спроведуваат во конкретните работни услови и работна средина, ќе се стекнат со квалификувана работна сила која ќе одговори на нивните барања, изјави Димитријевска.Обуката трае три месеци. Првите два месеца е теоретскиот, а третиот е практичниот дел, односно секојдневна практична работа во реални услови кај работодавци.
Од Центарот за вработување апелираат до невработените лица активно да се вклучат во процесот на барање работа преку мерките што се наменети за корисниците на гарантирана минимална помош. Дел од обуките ќе продолжат и наредната година, посочуваат надлежните, потенцирајќи дека невработените лица нема да го изгубат правото на гарантирана минимална помош додека посетуваат обука.
