Во Албанија денеска е Ден на жалост за жртвите по серијата земјотреси во кои, според досегашните податоци, загинаа најмалку 25 луѓе, а над 650 се повредени.
Спасувачките служби трагаат по преживени под урнатините, а според албанските медиуми досега се извлечени 45 лица. Спасувачките напори се одвиваат и покрај постојаното тресење на тлото, а само вчера околу 19 часот се регистрирани два посилни потреси со интензитет од 4,7 степени по Рихтер.
Поради страв од нови земјотреси, многу жители на местата погодени од разорните земјотреси, ноќта ја минаа во шатори.
Најголеми последици од земјотресот со јачина од 6,4 степени е во местото Тумане, 30 километри северно од Тирана, и во Драч.
Во Тумане се уште нема струја, а на Градскиот стадион се поставени шатори во кои се сместени семејствата кои останаа без домови. Другите се во своите домови или кај роднини и пријатели додека во земјата стигнува помош од цел свет.
Албанскиот премиер Еди Рама свика вонредна седница на владата и според негова оценка, државата и сите институции презеле се што е во нивна моќ да се санираат последиците од земјотресот.
Претседателот Илир Мета го откажа традиционалниот прием по повод Денот на независноста закажан за утре.
Земјотресот беше почувствуван и во Македонија, Хрватска, Црна Гора, БиХ и Италија. Утрово, според Европскиот медитерански сеизмолошки центар, Крит во Грција е погоден од земјотрес со магнитуда од 6 степени според Рихтеровата скала, со епицентар на длабочина од 56 километри. Земјотрес e почувствуван во Скопје и околината утринава во 8.23 часот.
