Речиси педесет заболени од овој сој откри лабораторијата во МАНУ. Заболени има во десетина града низ државата.Во Прилеп и Охрид најголем број. Медицискиот персонал од Клиниката за нефрологија не е заразен од оваа мутација на Ковид-19. 22 лица починаа во последното деноноќие
Расте бројот на заболени од британскиот сој на коронавирусот во Македонија. Досега во лабораторијата на МАНУ се потврдени 45 случаи. Мутацијата е дететктирана во повеќе градови низ државата а најмногу заболени од овој тип на вирусот се од Прилеп и Охрид.
„Првиот пациент со овој тип на вирус во оваа лабораторија е дијагностициран на 13.01.2021 во Охрид и оттогаш неговата застапеност прогресивно се зголемува. Во моментот оваа варијанта на вирусот е најфреквентна во Охрид и Прилеп, а е присустен и кај одредени пациенти во други градови: Тетово, Струга, Куманово, Штип, Велес“, соопштија од здравство.
Но ова не се сите градови во државата каде се потврдени заболени од оваа мутација. Потврда имаше за 46 годишен скопјанец дека е носител на овој тип на вирус, кој веќе се води како оздравен а првите симптони ги имал непоредно пред Новата Година. Британскиот сој сега е дететктиран и кај четворица кавадарчани, кои сега веќе се водат како оздравени како и кај пациент од Куманово.
Според официјалните податоци на Министерството за здравство во последните пет дена во Кавадарци се регистрирани 123 новозаболени, а во истиот период бројката на оздравени е релчиси двојно помала – 66 пациенти.
Кавадарци е трет на листата по број на активни случаи во моментов, по Скопје и Охрид, со 336 заболени.
Лекарите и медицинскиот персонал од Клиниката за Нефрологија, вкупно 29 лица, не се заболени од британскиот сој, потврдија анализите во МАНУ.
Британскиот сој на вирусот се појави во септември минатата година а истражувањата покажуваат дека овој сој, поради мутацијата, многу побрзо и полесно се шири меѓу населението бидејќи протеинот што ја обложува клетката на вирусот му овозможува побрзо да навлезе во клетките на организмот. Засега нема копнкретен доказ дека има поголема стапка на смртност кај заболените од оваа мутација.
Во последното деноноќие регистирани се дури 22 жртви и 75 новозаболени. Направени се 726 тестирања од кои 10-,3 отсто се позитивни. Од почетокот на епидемијата битката со вирусот ја загубија 2.946 лица а во монетов како активни се водат 6.486 случаи.
