Во Данска расте бројот на луѓе кои се заболени од позаразна варијанта на коронавирусот, кој првпат беше идентификуван во Велика Британија, објавија денеска властите повикувајќи се на прелиминарните податоци.
Во првата недела од февруари, 27 проценти од позитивните случаи чиј генетски материјал бил анализиран, имале варијанта Б117, во споредба со 20 проценти претходната недела, според извештајот на Државниот институт Серум (СИ).
Репродуктивниот број на новата варијанта, што укажува на стапката на пренесување на вирусот од страна на едно лице, е 0,99 проценти, прецизира СИ, што значи дека вирусот во моментов е во мал пад.
Бројот на лица заразени со коронавирусот во Данска опаѓа откако владата Воведе строги мерки на „заклучување“ во декември, така што во последните 24 часа беа регистрирани само 470 нови случаи, додека на крајот на минатата година тој број изнесуваше неколку илјади.
Во Данска, вкупно 1.690 лица се заразени со новата варијанта на вирусот, првпат откриена во Велика Британија.
