Вакцините против Ковид-19 во САД ќе бидат широко достапни во април, најави денеска водечкиот американски епидемиолог Ентони Фаучи.
Доктор р Фаучи тврди дека залихите ќе се зголемат, со што повеќе луѓе ќе можат да се имунизираат.
Пропорцијата на вакцинирани против Ковид-19 значително ќе се зголеми во наредните месеци, изјави тој за американската телевизија Ен-Би-Си.
Фаучи ја базираше својата прогноза на претстојните испораки на двете вакцини одобрени од САД, можноста за одобрување на трета вакцина, и мерките преземени од администрацијата на Бајден за зголемување на капацитетот за снабдување со вакцини.
– Чисто логистички, ќе бидат потребни уште неколку месеци за да се имунизираат возрасните Американци, рече директорот на Националниот институт за алергии и заразни болести на САД. Тој предвидува дека таканаречениот колективен имунитет во САД може да се постигне до крајот на летото.
САД се најтешко погодени од пандемијата, и се на првото место во светот по бројот на заразени со новиот коронавирус (над 27 милиони и 200 илјади) и смртни случаи – речиси 472 илјади, покажуваат податоците на универзитетот Џонс Хопкинс.
