По повод изборот на градоначалникот на општина Прилеп, Илија Јованоски, за НАЈ Еко градоначалник за 2018 година, денеска и официјално беше пуштено во употреба детското игралиште во Паркот на револуцијата, донација на „Пакомак“ и Шпаркасе банка. Покрај градоначалникот Јованоски, на отворањето на игралиштето присуствуваа и генералниот извршен директор на Шпаркасе Банка, Глигор Бишев и менаџерот за грижа на корисници од Пакомак, Ико Брдароски.
„За мене лично и за општина Прилеп, главен приоритет е животната средина. Заедно со комуналните претпријатија правиме напори да ги подобриме услови за живеење на нашите граѓани. Со овие чекори што ги преземавме досега, како и со оние кои што се зацртани за иднина, покажавме дека знаеме и дека можеме тоа да го направиме.
Прилеп беше прогласен за НАЈ Еко општина за 2018 година и во оваа прилика сакам да им се заблагодарам на ‘Пакомак’ и Шпаркасе Банка, кои по тој повод го донираа ова детско игралиште на Паркот на револуцијата. Сакам да потенцирам дека со целата наша посветеност работиме на подобрување на енергетската ефикасност во сите детски градинки, училишта. ЈКП ‘Комуналец’ во континуитет учествува во подобрување на животната средина во градот со чистење на каналите на Градската река, на Дабничка река, чистење на сите диви депонии во нашиот град. Општина Прилеп и ЈКП ‘Комуналец’ се први во примарната селекција на отпад, набавивме и камион за собирање на отпадот и преса за пакување на пластичниот отпад. Исто така набавивме и 4 нови автобуси на метан, а направивме и две фотоволтаични централи во Центарот за лица со детска парализа, како и во дел од градскиот пазар, со што покажавме дека се грижиме за здрава и чиста животна средина во нашиот град“, посочи градоначалникот Јованоски.
„Шпаркасе Банка и ‘Пакомак’ заедно повеќе години наназад работат на подигнување на свеста за здрава животна средина, за еколошко живеење. Го организиравме настанот ‘НАЈ Еко општина за 2018 година’, за општина која има највисоки стандарди во зачувувањето на човековата околина, грижа за зеленилото и здравото живеење и задоволство е што оваа награда ја доби Општина Прилеп. Продолжуваме и понатаму да ја подигаме свеста на граѓаните за оваа проблематика. Ова е признание не само за градоначалникот Илија Јованоски, туку и за сите граѓани на град Прилеп кои покажаа како е да се живее во здрава и чиста животна средина“, истакна Глигор Бишев, генерален извршен директор на Шпаркасе Банка Македонија.
„Сакам да упатам честитки до Општина Прилеп за изборот за ‘Нај еко општина’. Слушнавме од градоначалникот за многу работи кои до сега се реализирани, но и за оние кои допрба ќе бидат реализирани, со што се потврдува нашата одлука дека се број еден во Македонија. Со бројките со кои ние располагаме за собрана амбалажа на отпад на ниво на Македонија, можам да кажам дека многу општини од Прилеп можат да учат како да се собира амбалажниот отпад и како да допринесат тој отпад да не завршува на депонија, туку да заврши во фабриките за рециклирање“, истакна Ико Брдароски, менаџер за грижа на корисници од „Пакомак“.
Општина Прилеп и градоначалникот Илија Јованоски се победници на конкурсот за НАЈ Еко градоначалник за 2018 година, која ја заслужија со придонес во селективното собирање отпад, овозможување на собирање стакло преку HoReCa сегментот, бројни инвестиции за зазеленување на големи површини, како и за постигнување здрава и одржлива животна средина и намалување на необновливиот отпад.
